پاکستان ژجیانگ دے نال مختلف شعبیاں اچ تعاون دے فروغ کوں ٻہوں اہمیت ݙیندے، وزیراعظم محمد شہباز شریف

ہانگژو۔ 23 مئی (اے پی پی) وزیراعظم محمد شہباز شریف ژجیانگ صوبے دی شاندار ترقی کوں سراہیندیں ہوئیں آکھیے جو پاکستان ژجیانگ دے نال خصوصاً ڈیجیٹل معیشت، ای کامرس، انفارمیشن ٹیکنالوجی، ٹیلی کمیونیکیشن، زراعت، قابلِ تجدید توانائی، جدید صنعت کاری تے مہارتوں دی ترقی دے شعبیاں اچ تعاون دے فروغ کوں ٻہوں اہمیت ݙیندے۔ او ہفتہ کوں اتھاں ہانگژو اچ کمیونسٹ پارٹی آف چائنا ژجیانگ دی صوبائی کمیٹی دے پارٹی سیکریٹری مسٹر وانگ ہاؤ نال ملاقات اچ ڳالھ مہاڑ کریندے پئے ہن۔ وانگ ہاؤ وزیراعظم محمد شہباز شریف کوں ژجیانگ صوبے اچ خوش آمدید آکھیا۔ وزیراعظم ژجیانگ صوبے دے شاندار ترقیاتی منصوبیاں کوں سراہیا تے صدر شی جن پنگ دی دور اندیش قیادت دی تعریف کیتی جو انھاں پارٹی دی صوبائی کمیٹی دے پارٹی سیکریٹری دی حیثیت نال سرانجام ݙتی ہئی۔ وزیراعظم صدر شی جن پنگ ولوں پیش کیتے ڳئے ’’صاف پاݨی تے سرسبز پہاڑ انمول اثاثے ہن‘‘ دے تصور کوں بالخصوص سراہیا۔ وزیراعظم آکھیا جو ژجیانگ دی ترقی ایں ڳالھ دی ہک زندہ مثال اے جو ماحولیاتی تحفظ، سبز ترقی تے اعلیٰ معیار دی معاشی نمو کوں کینویں ہک ٻئے دے معاون انداز اچ اڳوں ودھایا ونڄ سڳدے۔ وزیراعظم آکھیا جو پاکستان ژجیانگ صوبے دے نال خصوصاً ڈیجیٹل معیشت، ای کامرس، انفارمیشن ٹیکنالوجی، ٹیلی کمیونیکیشن، زراعت، قابلِ تجدید توانائی، جدید صنعت کاری تے مہارتاں دی ترقی دے شعبیاں اچ تعاون دے فروغ کوں ٻہوں اہمیت ݙیندے، صوبائی سطح تے تعاون پاکستان-چین تعلقات دا ہک اہم ستون اے اتے اے صنعتی تعاون، زرعی جدیدکاری، ٹیکنالوجی دے اشتراک تے برآمدات تے مبنی ترقی دے ذریعے سی پیک فیز 2 کوں اڳوں بڑھاوݨ اچ اہم کردار ادا کر سڳدے۔ وزیراعظم تعاون تے مبنی ݙو اہم دستاویزات تے دستخط دی تقریب اچ وی شرکت کیتی۔ پہلی دستاویز ژجیانگ صوبے تے صوبہِ پنجاب دے درمیان سسٹر-پروونس تعلقات دے قیام نال متعلق مفاہمتی یادداشت ہئی۔ ایں مفاہمتی یادداشت دا مقصد تجارت، سرمایہ کاری، زراعت، تعلیم، ثقافت، سیاحت تے عوامی روابط دے شعبیاں اچ تعاون کوں فروغ ݙیوݨ اے۔ وزیراعظم ہانگژو نارمل یونیورسٹی تے بیجنگ اچ پاکستانی سفارتخانے وچال چین-پاکستان مشترکہ ٹیکنالوجی ریسرچ سینٹر دے قیام نال متعلق دستاویز تے دستخط دی تقریب اچ وی شرکت کیتی۔ اے مرکز تعلیمی تعاون، عملی تحقیق، ٹیکنالوجی دے تبادلے تے پاکستان تے چین دے اداریاں وچال روابط کوں فروغ ݙیسی۔ وزیراعظم آکھیا جو پاکستان تے چین سفارتی تعلقات دے قیام دی 75ویں سالگرہ منیندے پئن اتے ݙوہیں ملک عوام دوست، ترقی تے مبنی تے عملی تعاون دے ہک نویں دور اچ داخل تھیندے پئن ۔