پاکستان، سعودی عرب، سوڈان تے شام دا صحت دے شعبے اچ تعاون ودھاوݨ تے اتفاق

اسلام آباد۔ 24 مئی (اے پی پی) وفاقی وزیر برائے نیشنل ہیلتھ سروسز، ریگولیشنز اینڈ کوآرڈینیشن سید مصطفیٰ کمال جنیوا اچ ورلڈ ہیلتھ اسمبلی دے موقع تے سعودی عرب, سوڈان تے شام دے وزرائے صحت نال اہم ملاقاتاں کیتی جنھاں اچ فریقین صحت دے شعبے اچ تعاون کوں مضبوط بݨاوݨ تے اتفاق کیتا۔ وزارتِ نیشنل ہیلتھ سروسز ولوں اتوار کوں جاری اعلامیہ دے مطابق ملاقاتاں اچ صحت دے شعبے اچ جاری پیشرفت تے آپسی دلچسپی دے معاملیاں تے تفصیلی ڳالھ مہاڑ کیتی ڳئی۔ شریک ملک صحتِ عامہ دے نظام کوں ٻیا مضبوط بݨاوݨ، مشترکہ اقدامات دے فروغ تے صحت دے شعبے اچ ہک ٻئے دے تجربات توں فائدہ چاوݨ تے اتفاق کیتا۔ایں موقع تے ڳالھ مہاڑ کریندیں ہوئیں مصطفیٰ کمال آکھیا جو پاکستان دے شعبہِ صحت اچ جامع اصلاحات جاری ہن جئیں دا مقصد عوام کوں بہتر طبی سہولیات دی فراہمی تے صحت دی ݙیکھ بھال دے نظام کوں جدید بݨاوݨ اے۔ انھاں آکھیا جو پاکستان ویکسین دے شعبے اچ تیزی نال خود کفالتی دے حصول آلے پاسے ودھدا پئے اتے مقامی ویکسین دی تیاری کیتے تمام ضروری اقدامات کیتے ویندے پئن۔ وفاقی وزیر آکھیا جو پاکستان آپݨی قومی ویکسین پالیسی وی تشکیل ݙتی اے۔ انھاں ایں ڳالھ دا اعادہ کیتا جو پاکستان عالمی شراکت داراں دے نال رل تے صحت دے شعبے اچ بہتری کیتے آپݨا کردار ادا کریندا رہسی ۔