بنوں اچ پاک فوج، پولیس تے سی ٹی ڈی دا مشترکہ آپریشن، 2 اہم ترین سرغناں سمیت 16 خوارجی جہنم واصل

اسلام آباد۔ 24 مئی (اے پی پی) بنوں اچ پاک فوج، پولیس تے سی ٹی ڈی دے مشترکہ آپریشن اچ 2 اہم ترین خوارجی سرغناں سمیت 16 خوارجی جہنم واصل کر ݙتے ڳئے۔ آپریشن دے دوران 2 پولیس اہلکار شہید تھی ڳئے۔ پاک فوج، پولیس سمیت ٻئے سکیورٹی ادارے فتنہ الخوارج دے دہشت گرداں دے خلاف آپریشنز پوری شدت دے نال جاری رکھے ہوئن۔ سکیورٹی ذرائع دے مطابق بنوں دے علاقے میریان اچ پاک فوج، سی ٹی ڈی تے پولیس دہشت گرداں دی موجودگی دی اطلاعات تے مشترکہ آپریشن کیتا۔ گزریل ݙینھ تھیوݨ آلے آپریشن دے دوران 2 اہم ترین خوارجی سرغناں سمیت 16 خوارجی جہنم واصل کر ݙتے ڳئے۔ سکیورٹی ذرائع آکھیے جو علاقے اچ خوف تے دہشت کھنڈاوݨ آلا خوارجی سرغنہ زمری نور تے افغان خوارجی سرغنہ عبداللہ سعید کوں آپریشن دے دوران جہنم واصل کیتا ڳیا۔ انتہائی کٹھن آپریشن اچ پاک فوج، پولیس تے سی ٹی ڈی خوارج دے کئی ٹکاݨے وی تباہ کر ݙتے، آپریشن دے دوران پولیس دے ݙو اہلکاراں فرض دی ادائیگی دے دوران جامِ شہادت نوش کیتا، شہید کانسٹیبل وحید اللہ خان تے نور اللہ خان دی نمازِ جنازہ پولیس لائنز بنوں اچ سرکاری اعزاز دے نال ادا کیتی ڳئی، نمازِ جنازہ اچ اعلیٰ سول تے عسکری حکام، علاقہ عمائدین تے عوام دی وݙی تعداد شرکت کیتی۔ سکیورٹی فورسز تے قانون نافذ کرݨ آلے ادارے دہشت گردی دے خاتمے کیتے بدستور مشترکہ کارروائیاں جاری رکھے ہوئن، آخری خوارجی دے خاتمے تئیں فتنہ الخوارج دے خلاف کارروائیاں دا اے سلسلہ جاری رہسی۔