صدرِ مملکت دی کوئٹہ اچ دہشت گردی دے واقعے دی مذمت، دشمن عناصر عوام کوں نقصان ݙیوݨ دے نال پاکستان دی عالمی امن کوششاں توں توجہ ہٹاوݨ چاہندن، آصف علی زرداری

اسلام آباد۔ 24 مئی (اے پی پی) صدرِ مملکت آصف علی زرداری کوئٹہ اچ دہشت گردی دے واقعے دی شدید مذمت کریندیں ہوئیں آکھیے جو دشمن عناصر پاکستان دی عوام کوں نقصان ݙیوݨ دے نال پاکستان دی عالمی امن کوششاں توں توجہ ہٹاوݨ چاہندن۔ اتوار کوں ایوانِ صدر دے پریس ونگ توں جاری بیان اچ صدرِ مملکت آصف علی زرداری آکھیا جو دنیا دہشت گرداں تے انھاں دے سرپرستاں دا اصل چہرہ ݙیکھݨ جو او کینویں پاکستان دی عالمی امن دی کوششاں کوں متاثر کرݨ دی ناکام کوشش کریندے پئن۔ انھاں آکھیا جو کہیں کوں شک نئی ہووݨا چاہیدا جو پاکستان دہشت گرداں، انھاں دے سہولت کاراں، مالی معاونت کرݨ آلیاں تے محفوظ پناہ گاہیں فراہم کرݨ آلیاں کوں شکست ݙیسی۔ صدر آصف علی زرداری آکھیا جو امن، استحکام تے قومی سلامتی دے خلاف ہر سازش کوں ناکام بݨیسوں اتے دہشت گرداں تے انھاں دے سرپرستاں کوں نہ بھلسوں اتے نہ معاف کریسوں۔ صدرِ مملکت آکھیا جو شہداء دا خون رائیگاں نہ ویسسی، شہداء دے خون دے ہر قطرے دا حساب گھدا ویسسی۔