سکیورٹی فورسز شمالی وزیرستان اچ کارروائی کریندیں ہوئیں 11 خوارج کوں ہلاک کر ݙتے

راولپنڈی۔ 24 مئی (اے پی پی) سکیورٹی فورسز شمالی وزیرستان اچ کارروائی کریندیں ہوئیں 11 خوارج کوں ہلاک کر ݙتے ۔ پاک فوج دے شعبہ تعلقات عامہ (آئی ایس پی آر) دے مطابق سکیورٹی فورسز انٹیلی جنس بنیاداں تے کارروائیاں دا سلسلہ جاری رکھدے ہوئیں گزریل 48 گھنٹیاں اچ شمالی وزیرستان دے ضلع دتہ خیل اچ خوارج دے کئی  ٹھکاݨیاں کوں نشانہ بݨایا۔ شدید تے بھرپور فائرنگ دے تبادلے دے بعد بھارتی حمایت یافتہ فتنہ الخوارج توں تعلق رکھݨ آلے 11 خوارج کوں ہلاک کر ݙتا ڳیا۔ کارروائی دے دوران ہلاک تھیوݨ آلے دہشت گرداں دے قبضے توں وݙی مقدار اچ اسلحہ تے گولا بارود وی برآمد کیتا ڳئے، مارے ونڄݨ آلے خوارج علاقے اچ کئی دہشت گرد کارروائیاں اچ ملوث ہن۔ علاقے اچ لکے باقی خوارج دے خاتمے کیتے وفاقی ایپکس کمیٹی دے منظور شدہ نیشنل ایکشن پلان دے تحت “عزمِ استحکام” وژن دے مطابق کلیئرنس تے سرچ آپریشنز جاری ہن۔ سکیورٹی فورسز تے قانون نافذ کرݨ آلے ادارے ملک توں بیرونی سرپرستی اچ تھیوݨ آلی دہشت گردی دے مکمل خاتمے تئیں آپݨی انسدادِ دہشت گردی مہم پوری قوت نال جاری رکھیسن۔