چینی صدر دے 4 نکاتی ایجنڈے دی مکمل حمایت، امن اتے کاروبار دی بحالی کیتے رل تے کم کرݨا پوسی، وزیراعظم شہباز شریف دا بیجنگ اچ استقبالیہ نال خطاب

بیجنگ۔ 25 مئی(اے پی پی):وزیراعظم محمد شہباز شریف خلیج اتے مشرقِ وسطیٰ اچ امن کیتے چین دے صدر شی جن پنگ دے 4 نکاتی ایجنڈے دی مکمل حمایت کریندے آکھیے جو دنیا نازک مرحلے توں لنگھدی پئی اے، امن اتے کاروبار دی بحالی کیتے رل تے کم کرݨا پوسی، چین پاکستان دی امن اتے جنگ بندی کیتے کوششاں دی بھرپور حمایت کیتی اے، معاملات درست پاسے اڳوں تے ودفدے پئن۔ انہاں اے ڳالھ بیجنگ اچ عظیم عوامی ہال اچ ݙتی ڳئی استقبالیہ تقریب نال خطاب اچ آکھی۔ ایں موقع تے چین دے وزیراعظم لی چیانگ، نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر اتے پاکستان اتے چین دے وزرا اتے اعلیٰ حکام وی موجود ہن۔ وزیراعظم محمد شہباز شریف چین دے دورے دی پرتپاک دعوت تے چینی وزیراعظم دا شکریہ ادا کریندے ہوئیں آکھیا جو تہاڈے عظیم ملک دا دورہ کرݨ میڈے کیتے ہمیشہ ݙاݙھی خوشی دی ڳالھ ہوندی اے۔ انھاں چین دے برادر عوام نال صوبہ شانشی دی کوئلے دی کان اچ دھماکے تے پرچایا جیندے اچ قیمتی جاناں ضائع تھئین اتے کئی لوگ زخمی وی تھئن۔ وزیراعظم متاثرہ خانداناں نال یکجہتی ݙکھائی۔

انھاں آکھیا جو پاکستان اتے چین اپݨی شاندار دوستی اتے سفارتی تعلقات دا 75واں سال منیندے پئن، پاکستان چین دوستی دی بنیاد اساݙے بانیان رکھی ہئی، انھاں ݙوہاں ملکاں دے تعلقات دی مضبوط بنیاد اتے مستحکم عمارت قائم کیتی، ہݨ اساں ایں ورثے کوں اڳوں تے ودھیندے پئے ہیں اتے ݙوطرفہ تعلقات کوں ٻہا ودھاوݨ دے پندھ تے ہیں، پاکستان، امریکا اتے ایران وچال ثالثی اچ مخلصانہ کردار ادا کیتے، فیلڈ مارشل سید عاصم منیر اتھاں تہران توں سیدھے پڄین، او مسلسل سفر اچ رہین، فیلڈ مارشل اتے نائب وزیراعظم اسحاق ڈار امریکا، ایران اتے خلیج دے ملکاں سودھا ساریاں نال رابطے کیتن۔ وزیراعظم محمد شہباز شریف امن کیتے نیک خواہشات پچیندے آکھیا جو ایں سانڳے ٻہوں سارا کم تھی چکیے اتے معاملات درست پاسے اڳوں تے ودھدے پئن۔ انھاں پاکستان دی امن کیتے کوششاں دی بھرپور حمایت اتے جنگ بندی کیتے چین دے صدر شی جن پنگ اتے چینی قیادت دے تعاون دا شکریہ ادا کیتا۔ انھاں صدر شی جن پنگ دے 4 نکاتی ایجنڈے دی مکمل حمایت کریندے آکھیا جو نائب وزیراعظم اسحاق ڈار اتے چینی وزیر خارجہ وانگ یی نال ملاقات اچ وی انھاں 5 نکاتی حمایتی پروگرام دا اعلان کیتا ہئی، جنگ بندی کیتے اساکوں رل تے کم کرݨا پوسی تاں جو دنیا اچ امن قائم تھیوے اتے کاروبار بحال تھیوے، ایں بحران نہ صرف خطے دی معیشت ٻھل پاکستان جیڑھا تیل اتے تیل دی مصنوعات دا خالص درآمد کنندہ اے سودھا عالمی برادری کوں وی شدید متاثر کیتے۔ چین دے وزیراعظم لی چیانگ آکھیا جو چین پاکستان نال رل تے کم کرݨ کیتے پرعزم اے، پاکستان قریبی رابطے اتے ہم آہنگی کوں برقرار رکھے اتے مشترکہ مفادات دا تحفظ کیتے۔ انھاں پاکستان دے علاقائی امن کیتے مثبت کردار کوں سراہندے آکھیا جو صدر شی جن پنگ دی اڄ وزیراعظم محمد شہباز شریف نال ملاقات تھیسی جیڑھی ݙوطرفہ تعلقات کوں ٻیا ودھاوݨ کیتے سٹرٹیجک رہنمائی ݙیسی۔ انھاں آکھیا جو چین پاکستان نال روایتی دوستی کوں اڳوں تے ودھاوݨ اتے دباہمی تعاون ٹورݨ چاہندے، اساں پاکستان نال عملی تعاون ودھاوݨ اتے باہمی دلچسپی دے سارے امور تے ڳالھ مہاڑ کیتے تیار ہیں۔ ایں توں پہلے چین دے وزیراعظم لی چیانگ وزیراعظم محمد شہباز شریف اتے پاکستانی وفد دا عظیم عوامی ہال آوݨ تے پرتپاک استقبال کیتا۔ ایں موقع تے ݙوہاں رہنماواں گرمجوشی نال مصافحہ کیتا اتے خیرسگالی دے جذبات دا اظہار کیتا۔ وزیراعظم نائب وزیراعظم و وزیر خارجہ سینیٹر محمد اسحاق ڈار، فیلڈ مارشل سید عاصم منیر تے پاکستانی وفد ڄݙاں جو چین دے وزیراعظم اپݨی کابینہ دے ارکان دا وزیراعظم محمد شہباز شریف نال تعارف کرایا۔ ایں موقع تے ݙوہاں ملکاں دے قومی ترانے وڄائے گئے اتے وزیراعظم کوں چین دی مسلح افواج دے چاق و چوبند دستیاں ولوں گارڈ آف آنر پیش کیتا گیا۔ وزیراعظم شہباز شریف گارڈ آف آنر دا معائنہ کیتا جیںدے بعد ݙوہاں رہنماواں وچال وفود دی سطح تے ڳالھ مہاڑ تھئی۔