وزیراعظم محمد شہباز شریف اتے چین دے صدر شی جن پنگ دا ݙوطرفہ ساڄھے داری ودھ توں ودھ تکڑی کرݨ دا عزم

بیجنگ۔ 25 مئی (اے پی پی)وزیراعظم محمد شہباز شریف اتے چین دے صدر شی جن پنگ ݙوہاں ملکاں وچال سنڳت اتے تزویراتی شراکت داری ودھ توں ودھ تکڑی کرݨ دا عزم دوہرائے۔ اے عزم بیجنگ اچ وزیر اعظم شہباز شریف اتے چینی صدر شی جن پنگ دی ملاقات اچ ودھایا ڳئے۔ وزیراعظم محمد شہباز شریف صدر شی جن پنگ کوں پاکستان دا عظیم دوست اتے امن پسند انسانیت دا عظیم علمبردار قرار ݙیندے آکھیا جو چین دا ولا دورہ انھاں کیتے ݙاݙھی خوشی دی ڳالھ اے، انتہائی پرتپاک استقبال تے شکریہ ادا کرینداں، ساݙے سفارتی تعلقات دی 75 ویں سالگرہ اے، ایں مبارک موقع تے میں اپݨے چینی بھراواں، ٻھیݨیں سودھا پاکستانی عام کؤں وی مبارک ڈینداں ، ایندا سارا کریڈٹ اساݙے بانی رہنماواں کوں ویندے

 جنھاں پچھلے ست ݙھاکیاں توں ایں رشتے کوں مضبوط بݨاوݨ کیتے سخت محنت کیتی اے۔ وزیراعظم صدر شی جن پنگ کوں مخاطب کریندے آکھیا جو تہاڈے عظیم والد وی ایں ڳانݙھے کوں مضبوط کرݨ کیتے ݙاݙھا قیمتی کردار ادا کیتے، اساں رل تے آوݨ والے ویلھے اچ ایں رشتے کوں مضبوط توں مضبوط تر ٻݨیسوں، اتے رل تے اپݨے 75 سالہ سفارتی تعلقات دا جشن مناوݨ دا جیہڑا منصوبہ ٻݨائے او پورا سال جاری رہسی جیہڑا اساݙے ایں غیرمتزلزل عزم کوں ݙسیندے جو چین اتے پاکستان ہک جان تے ݙو قالب ہین، ایں نویکلے رشتے دی کوئی مثال نئیں ملدی۔ وزیراعظم آکھیا جو انھاں پچھلے سال چینی پریڈ اچ چین دی فوجی طاقت ݙٹھی، ایں پریڈ ڄڳ کوں ݙکھایا جو صدر شی جن پنگ دی متحرک قیادت اچ چین نہ صرف ہک عالمی معاشی طاقت اے ٻھل ہک فوجی طاقت وی اے جیہڑا کثیر الجہتی تعاون دے فلسفے کوں ودھیندے ہوئیں دنیا اچ ترقی اتے امن کیتے کم کریندا پئے۔ وزیراعظم آکھیا جو انھاں ہانگژو دی پرسکون خوبصورتی، چراگاہواں، باغات، باغیچے، جھیلاں، خوبصورت عمارتاں اتے سڑکاں دا ڄال ݙٹھے، علی بابا جیہڑی عظیم کمپنی دا دورہ کیتے جیہڑی بلامبالغہ صدر شی جن پنگ دی دوراندیش قیادت دا عکاس اے۔ وزیراعظم آکھیا جو صدر شی جن پنگ دا سفر بچپن توں ہی مقابلہ کرݨ دی سکت، ہمت اتے استقامت نال بھریا ہویا اے جیہڑا انھاں دی خاموش قیادت دی عکاسی کریندے جیہڑی لوگاں دی تقدیر کوں خوشحالی تے ترقی دو ڳھن ونڄݨ تے توجہ مرکوز رکھیندی اے۔ صدر شی جن پنگ دی قیادت بیلٹ اینڈ روڈ اقدامات تے سی پیک دے ذریعے دوستی کوں فروغ ݙیندی پئی اے۔ انھاں آکھیا جو اے تہاکوں عالمی سطح تے ہک ممتاز اتے بلند قامت شخصیت ٻݨیندے، حقیقی قیادت خود کوں وقف کرݨ، محنت، قربانی اتے مسلسل کوششاں نال ملدی اے، لوگاں دے دلاں اچ ڄاہ ٻݨاوݨ دا کوئی ٻیا رستہ کائنی، صدر شی جن پنگ دی قیادت لوگاں دی خدمت، عوام تے مرکوز خوشحالی اتے ترقی دا ہک تکڑا اظہار اے، میں تہاݙی قیادت توں ٻہوں حوصضہ پکڑینداں۔ وزیراعظم آکھیا جو پاکستان اچ اللہ دے فضل نال اساں ٻہوں ساریاں تبدیلیاں گھن آئے ہیں، ودھ ڈھانچہ جاتی اصلاحات کیتن، حالی وݙا پندھ طے کرݨے کیوں جو اے تبدیلیاں ٻہوں پہلے تھیوݨیاں چاہیداں ہن، نائب وزیراعظم و وزیر خارجہ، فیلڈ مارشل اتے اساݙی عظیم ٹیم زبردست کم کیتے۔ چین دے صدر شی جن پنگ آکھیا جو وزیراعظم شہباز شریف دے توسط نال میں پاکستانی عوام کوں گرمجوشی نال خراجِ تحسین پیش کرݨ چاہنداں، فیلڈ مارشل عاصم منیر کوں وی چین اچ خوش آمدید آہداں، میں ڄاݨداں جو او ایران توں ولین جتھاں انھاں امن کیتے ثالثی کریندے ہوئیں مثبت کوششاں کیتن، اساں پاکستان دے تعمیری کردار کوں قدر نال ݙیہدے ہیں، چین اتے پاکستان ہک ٻئے کوں سمجھیا، ہک ٻئے تے بھروسہ کیتا اتے ہک ٻئے دی حمایت کیتی اے۔ انھاں آکھیا جو اساݙے تزویراتی اعتماد اتے عملی تعاون اساݙی باہمی ترقی اچ ودھ حصہ ݙتے، بین الاقوامی تبدیلیاں دے باوجود چین ہمیشہ ایں خطے دی اپݨی خارجہ پالیسی اچ پاکستان نال تعلقات کوں اول ترجیح ݙتی اے، حال ہی اچ میکوں تیانجن یونیورسٹی دے پاکستانی طلباء دا خط ملے، او چین تے پاکستان وچال تعاون دے معمار، تبادلے کوں فروغ ݙیوݨ والے اتے دوستی دے محافظ ٻݨݨ دا عزم رکھدن، میکوں اے ݙیکھ تے وݙا حوصلہ ملے جو نوجوان نسل اساݙی دوستی دے رشتے اڳوں تے ودھیندی پئی اے۔ انھاں آکھیا جو چین پاکستان دے نال رل تے آوݨ والے دور اچ چین-پاکستان مشترکہ مستقبل دے حامل معاشرے دی تعمیر تیز کرݨ کیتے ایں توں وی ودھ تعاون چاہندے، ݙوہاں ملکاں دے عوام کوں ٻیا فائدہ پچاوݨ، علاقائی امن و استحکام اچ حصہ ݙیوݨ، ہمسایہ ملکاں وچال مشترکہ مستقبل دے حامل معاشرے دی تعمیر کیتے مثالی تعاون کوں تیار اے۔