وزیراعظم محمد شہباز شریف دی چین دے صدر شی جن پنگ نال پرجوش اتے خوشگوار ملاقات

بیجنگ۔ 25 مئی(اے پی پی)پاکستان اے چین ݙوہاں ملکاں دی سنڳت دی تاریخی وراثت کوں اڳوں تے ودھیندے ہوئیں سفارتی تعلقات دے قیام دی 75 ویں سالگرہ کوں سٹریٹجک، عملی اتے مستقبل تے مبنی تعاون دے ہک نویں دور اچ وٹاوݨ تے اتفاق کیتے، وزیراعظم محمد شہباز شریف زور ݙتے جو سٹریٹجک رابطہ کاری کوں ٻیا مضبوط کیتا ونڄے، سی پیک دی ترقی کوں اڳوں تے ودھایا ونڄے اتے چین دے 15 ویں پانچ سالہ منصوبے کوں ’’اڑان پاکستان‘‘ پروگرام نال جوریا ونڄے تاں جو صنعتکاری، باہمی روابط، سائنس و ٹیکنالوجی، زراعت، قابلِ تجدید و صاف توانائی اتے ڈیجیٹل تبدیلی دے شعبیاں اچ وسیع تعاون کوں ٻیا ودھیڄے۔ وزیراعظم محمد شہباز شریف بیجنگ اچ چین دے صدر شی جن پنگ نال ݙاݙھی پرجوش اتے خوشگوار ماحول اچ ملاقات کیتی۔ اے ملاقات پاکستان اتے چین وچال سفارتی تعلقات دے قیام دی 75 ویں سالگرہ دے تناظر اچ تھئی۔ ملاقات اچ نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سودھا ٻئے سینئر وزرا تے سرکاری حکام وی موجود ہن۔ وزیراعظم صدر شی جن پنگ ولوں شاندار استقبال تے شکریہ ادا کیتا اتے عزم دوہرایا جو پاکستان-چین دیریںہ سٹریٹیجک کوآپریٹو شراکت داری پاکستان دی خارجہ پالیسی دا بنیادی ستون اے۔ وزیراعظم چین دے بنیادی مفادات خصوصاً ’’ون چائنا پالیسی‘‘ تے پاکستان دی غیر متزلزل حمایت دا اعادہ کیتا اتے پاکستان دی خودمختاری، علاقائی سالمیت، قومی ترقی اتے معاشی استحکام کیتے چین دی مستقل حمایت کوں سراہیا۔ وزیراعظم ہک ݙینھ پہلے ہانگژو دے کامیاب دورے دا ݙسیندے ژی جیانگ صوبے دی ترقی اچ صدر شی جن پنگ دے کلیدی کردار کوں سراہیا جتھاں او 2002ء توں 2007ء تئیں ک گورنر رہے ہن۔ انھاں صدر شی جن پنگ دی جراتمندانہ اتے دوراندیش قیادت دی وی تعریف کیتی جئیں چین کوں ہک عالمی طاقت اچ وٹا ݙتے۔ علاقائی امن کیتے چین دی حمایت کوں سراہندے ہوئیں وزیراعظم آکھیا جو صدر شی جن پنگ دی علاقائی امن کیتے پیش کیتی گئی چار نکاتی تجویز کوں وسیع پیمانے تے پذیرائی ملی اے۔ وزیراعظم آکھیا جو موجودہ غیر یقینی اتے کشیدہ عالمی حالات اچ پاکستان اتے چین دی دوستی اتے تعاون خطے اتے ڄڳ اچ استحکام دا اہم ذریعہ ٻݨیے ہوئن۔ انھاں صدر شی جن پنگ دے وژن تے مبنی عالمی اقدامات جیندے اچ بیلٹ اینڈ روڈ انیشی ایٹو، گلوبل ڈویلپمنٹ انیشی ایٹو، گلوبل سکیورٹی انیشی ایٹو، گلوبل سولائزیشن انیشی ایٹو اتے گلوبل گورننس انیشی ایٹو شامل ہن، کوں سراہیا۔ وزیراعظم ’’انسانیت دے مشترکہ مستقبل دی حامل عالمی برادری‘‘ دے وژن کیتے پاکستان دی مکمل حمایت دا وی اعادہ کیتا۔ انہاں ݙوہاں ملکاں وچال تعاون ٻیا تکڑا ٻݨاوݨ دا عزم دوہریندے آکھیا جو سٹریٹجک رابطہ کاری کوں ٻیا مضبوط کیتا ونڄے، سی پیک دی ترقی کوں اڳوں تے ودھایا ونڄے اتے چین دے 15ویں پانچ سالہ منصوبے کوں ’’اڑان پاکستان‘‘ پروگرام نال جوریا ونڄے تاں جو صنعتکاری، باہمی روابط، سائنس و ٹیکنالوجی، زراعت، قابلِ تجدید و صاف توانائی اتے ڈیجیٹل تبدیلی دے شعبیاں اچ وسیع تعاون کوں ٻیا ودھیڄے۔ وزیراعظم آکھیا جو چین دے خلائی اسٹیشن پروگرام کیتے پاکستانی خلا بازاں دا انتخاب پاکستان-چین تعاون دی ودھدی ہوئی مضبوطی دا مظہر اے۔ صدر شی جن پنگ آکھیا جو چین اتے پاکستان باہمی اعتماد، تفہیم اتے تعاون تے مبنی ’’ناقابلِ شکست روایتی دوستی‘‘ قائم کیتی اے، عالمی حالات اچ تبدیلیاں دے باوجود چین اپݨی ہمسایہ پالیسی اچ پاکستان نال تعلقات کوں ہمیشہ ترجیح ݙیسی اے۔ انہاں اتفاق کیتے جو پاکستان-چین دوستی دی تاریخی وراثت کوں اڳوں تے ودھیندے ہوئیں 75 ویں سالگرہ کوں سٹریٹجک, عملی اتے مستقبل تے مبنی تعاون دے ہک نویں دور اچ وٹایا ویسی۔