بیجنگ۔ 26 مئی (اے پی پی)وزیراعظم محمد شہباز شریف بیجنگ اچ چین دیاں وݙیاں کمپنیاں دے اعلیٰ سطح دے وفود نال ملاقاتاں کیتن جیندے اچ سی پیک دے ݙوجھے مرحلے دے تحت اقتصادی، صنعتی اتے بنیادی ڈھانچے دے شعبیاں اچ تعاون ٻیا ودھاوݨ دا عزم دوہرایا ڳئے۔ وزیراعظم فیمسن دے وفد نال ملاقات کیتی جیندے اڳواݨ کمپنی دے چیف ایگزیکٹو آفیسر ژینگ جون چن ہن۔ وزیراعظم پاکستان دے زرعی شعبے، …
وزیراعظم شہباز شریف دی بیجنگ اچ وݙیاں چینی کمپنیاں دے وفداں نال ملاقاتاں
مزید خبراں
بیجنگ۔ 26 مئی (اے پی پی)وزیراعظم محمد شہباز شریف بیجنگ اچ چین دیاں وݙیاں کمپنیاں دے اعلیٰ سطح دے وفود نال ملاقاتاں کیتن جیندے اچ سی پیک دے ݙوجھے مرحلے دے تحت اقتصادی، صنعتی اتے بنیادی ڈھانچے دے شعبیاں اچ تعاون ٻیا ودھاوݨ دا عزم دوہرایا ڳئے۔ وزیراعظم فیمسن دے وفد نال ملاقات کیتی جیندے اڳواݨ کمپنی دے چیف ایگزیکٹو آفیسر ژینگ جون چن ہن۔ وزیراعظم پاکستان دے زرعی شعبے، خاص طور تے اناج کوں سانٻھݨ(ذخیرہ کرݨ)، فیڈ دی پیداوار اتے غذائی تحفظ دے حوالے نال فیمسن دیاں وݙیاں خِدمات کوں سراہیا۔ وزیراعظم فصلاں دی کٹائی دے بعد تھیوݨ والے نقصاناں اچ گھاٹے کوں حکومت دیاں ترجیحات اچ رلیندے ہوئیں فیمسن کوں خصوصی اقتصادی زونز اتے گرین پاکستان انیشی ایٹو دے تحت ملݨ والیاں مراعات توں فائدہ چاوݨ اتے پاکستان اچ مینوفیکچرنگ اتے ٹیکنالوجی دی منتقلی دیاں سہولتاں قائم کرݨ دی دعوت ݙتی۔ وزیراعظم شینڈونگ ژن شو گروپ کارپوریشن دے چیئرمین ہاؤ جیان شن اتے انہاں دے وفد نال وی ملاقات کیتی اتے پاکستان اچ سمندری (بحری) شعبے دی ترقی، بیٹری مینوفیکچرنگ، معدنیات دی پراسیسنگ اتے صنعتی تعاون دے شعبیاں اچ گروپ دی ودھدی ہوئی سرمایہ کاری دا خیرمقدم کیتا۔ وزیراعظم ژن شو گروپ دے ژن شو اسپیشل اکنامک زون، پورٹ قاسم اچ سی ٹو اسٹیل منصوبے، گوادر اتے شمالی معدنیاتی شعبیاں اچ سرمایہ کاری دے کردار دی تعریف کیتی۔ وزیراعظم اِنہاں سٹریٹجک منصوبیاں کیتے حکومتِ پاکستان دے پورے تعاون دا عزم دوہریندے ہوئیں سی پیک دے ݙوجھے مرحلے دے تحت اِنہاں تے تکھے عملدرآمد تے زور ݙتا۔ وزیراعظم چائنا کمیونیکیشنز کنسٹرکشن کمپنی دے چیئرمین ژانگ بنگنان اتے چائنا روڈ اینڈ برج کارپوریشن (سی آر بی سی) دے اعلیٰ نمائندیاں نال وی ملاقات کیتی۔ وزیراعظم پچھلے چھی ݙھاکیاں توں پاکستان اچ بنیادی ڈھانچے دی ترقی، خاص طور تے قراقرم ہائی وے اتے رشکئی سپیشل اکنامک زون جھئیں اہم منصوبیاں اچ اِنہاں کمپنیاں دے کردار کوں سراہیا۔ انہاں سی پیک دے تحت ایم ایل-1، قراقرم ہائی وے دی ری الائنمنٹ اتے رابطیاں دے ٻنہاں منصوبیاں تے تکھے پیش رفت کیتے پاکستان دا عزم دوہرایا تے زور ݙتے جو پاکستان سی آر بی سی کوں بنیادی ڈھانچے کوں جدید ٻݨاوݨ اتے علاقائی رابطیاں دے ودھارے کیتے لمبی مُدت دا اسٹریٹجک شراکت دار سمجھدے۔ چینی کمپنیاں پاکستان دی اقتصادی صلاحیت تے اعتماد ݙکھیندے زراعت، صنعتی پیداوار، لاجسٹکس، بنیادی ڈھانچے اتے ٹیکنالوجی سودھا مختلف شعبیاں اچ سرمایہ کاری ودھاوݨ اچ اپݨی دلچسپی ݙکھائی۔ اِنہاں ملاقاتاں اچ وزیر اعظم دی مدد وفاقی وزرا اتے اعلیٰ سرکاری حکام کیتی، جنہاں کوں اِنہاں کاروباری ملاقاتاں اچ کیتے ڳئے فیصلیاں تے اثر دار اتے ویلے سر عملدرآمد یقینی ٻݨاوݨ دی ہدایت کیتی گئی۔
