وزیر اعظم شہباز شریف دا ملائیشین ہم منصب نال رابطہ، عیدالاضحیٰ دی مبارک ݙتی

لاہور۔ 27 مئی(اے پی پی)وزیر اعظم محمد شہباز شریف پاکستان دے امن اقدام دی بھرپور حمایت تے ملائیشیا دے وزیر اعظم ڈاکٹر انور ابراہیم دا شکریہ ادا کریندے انہاں کوں خطے اچ قیامِ امن سانگے جاری سفارتی کوششاں نال جڑے تازہ ترین حالات دا ݙسائے۔ ٻُدھ کوں وزیر اعظم محمد شہباز شریف ملائیشیا دے وزیر اعظم ڈاکٹر انور ابراہیم کوں ٹیلی فون کیتے۔وزیر اعظم آفس دے میڈیا ونگ توں جاری بیان دے مطابق وزیر اعظم شہباز شریف ملائیشین قیادت اتے برادر ملائیشین عوام کوں عیدالاضحیٰ دی مبارکباد ݙتی۔ وزیر اعظم انور ابراہیم وی وزیر اعظم پاکستان اتے برادر پاکستانی عوام کوں عید دی مبارک ݙتی۔ انہاں سابق وزیر اعظم محمد نواز شریف سانگے خصوصی نیک تمناواں پچائن۔ ملائیشیا دے وزیر اعظم خلیج اچ جنگ بندی دے قیام اتے خطے اچ پائیدار امن سانگے جاری کوششاں کیتے پاکستان دے مؤثر اتے تعریف دے قابل کردار کوں سراہے۔ انہاں وزیر اعظم اتے اُنہاں دی ٹیم سانگے دعا کیتی اے جو اللہ تعالیٰ انہاں کوں ودھ کامیابیاں اتے طاقت ݙیوے۔ وزیر اعظم شہباز شریف پاکستان دے امن اقدام دی بھرپور حمایت اتے اپݨے ملائیشین ہم منصب دا شکریہ ادا کریندے انہاں کوں خطے اچ قیامِ امن سانگے جاری سفارتی کوششاں نال جڑے تازہ ترین حالات دا ݙسایا۔ وزیر اعظم آکھیے جو انہاں کوششاں اچ ملائیشیا سودھا برادر ملکاں دے تعاون اہم کردار ادا کیتے، فیلڈ مارشل سید عاصم منیر دی انتھک سفارتی کوششاں اتے نائب وزیر اعظم و وزیر خارجہ محمد اسحاق ڈار دے فعال کردار پاروں پاکستان امن عمل کوں اگوں ودھاوݨ اچ کامیاب تھئے۔ ملائیشیا دے وزیر اعظم انہاں کوششاں کوں سراہندے فیلڈ مارشل سید عاصم منیر سانگے اپݨیاں نیک تمناواں پچائن۔ وزیر اعظم انور ابراہیم نے پاکستان دے امن اقدام کوں قائد اعظم محمد علی جناح دے وژن تے نظریے دے عین مطابق قرار ڈیندے ایندی تعریف کیتی۔ ݙوہاں رہنماواں لبنان اچ اسرائیلی سکیورٹی فورسز دی کارروائیاں اتے غزہ دی وڳڑدی صورتحال تے چنتا وی کیتے۔ وزیر اعظم شہباز شریف آکھیے جو او وزیر اعظم انور ابراہیم نال اسلام آباد، کوالالمپور یا کہیں بین الاقوامی تقریب دے موقع تے ولا ملاقات دے تانڳھی ہین۔ ݙوہاں رہنماواں خطے دی صورتحال تے تھیوݨ والی پیش رفت توں ہک ݙوجھے کوں مسلسل آگاہ رکھݨ تے وی اتفاق کیتے۔