فیلڈ مارشل سید عاصم منیر دا ژوب دا دورہ، فرنٹ لائن فوجیاں نال عیدالاضحیٰ منائی

راولپنڈی ۔ 27 مئی (اے پی پی)فیلڈ مارشل، چیف آف ڈیفنس فورسز، آرمی چیف سید عاصم منیر نشان امتیاز (ملٹری)، ہلال جرات مغربی سرحداں تے تعینات فرنٹ لائن فوجیاں نال عیدالاضحیٰ مناوݨ سانگے ضلع ژوب، بلوچستان دا دورہ کیتے۔ پاک فوج دے شعبہ تعلقات عامہ (آئی ایس پی آر) دی جاری پریس ریلیز دے مطابق دورے دی شروعات نماز عید دی ادائیگی دے نال نال پاکستان اچ پائیدار امن، استحکام، خوشحالی اتے مادر وطن دے دفاع اچ لازوال قربانیاں پیش کرݨ والے شہداء سانگے خصوصی دعائیں نال تھئے۔ پاک فوج دے افسراں اتے جواناں کوں عید دی مبارک ݙیندے ہوئیں فیلڈ مارشل انہاں دے غیر معمولی، غیر متزلزل عزم، آپریشنل تیاریاں اتے غیر ملکی اسپانسر شدہ دہشت گردی دے دوران ثابت قدمی کوں سراہے۔ انہاں فوجیاں کوں انہاں دی بے مثال ہمت اتے قربانیاں تے زبردست خراج تحسین پیش کیتے، جنہاں دہشت گردی دی لعنت اتے دشمن قوتاں ولوں سپانسر شدہ دشمنانہ خطرات توں قوم دی حفاظت کیتی اے۔ کوئٹہ اچ ہندوستان دی سرپرستی اچ فتنہ الہند اتے ایندی پراکسیز دے حالیہ بزدلانہ دہشت گردی دے واقعے دا حوالہ ݙیندے ہوئیں فیلڈ مارشل عزم دوہراعے جو اینڄھیاں غیر انسانی اتے سفاکانہ کارروائیاں پاکستان دی مسلح افواج یا قوم دے عزم کوں کمزور نئیں کر سڳدیاں۔ انہاں زور ݙے تے آکھیے جو افواج اتے پاکستانی عوام دے حوصلے اتے عزم غیر متزلزل ہن۔ انہاں دوہرائے جو مسلح افواج قانون نافذ کرݨ والے اداریاں اتے بلوچستان دے عوام دے نال قریبی ہم آہنگی نال دہشت گردی دے سٻھے سہولت کاراں، انہیں دی حوصلہ افزائی کرݨ والیاں اتے مجرماں دا پوری قوت نال پیچھا جاری رکھیا وسی۔ ایں توں پہلے فیلڈ مارشل سید عاصم منیر دا استقبال کور کمانڈر کوئٹہ کیتا۔ فیلڈ مارشل یادگار شہداء تے پھلاں دی چادر وی چڑھائی اتے مادر وطن دے دفاع اچ شہادت کوں ڳل لاوݨ والے دھرتی دے بہادر پُتراں کوں خراج عقیدت پیش کیتے۔