اقوامِ متحدہ اچ پاکستان دا بھارت دے دہشت گردی الزامات دا بھرپور جواب، خفیہ کارروائیاں دے شواہد پیش کر ݙتن

اقوام متحدہ۔ 27 مئی(اے پی پی)پاکستان اقوامِ متحدہ دی سلامتی کونسل اچ بھارت دے سرحد پار دہشت گردی دے الزامات کوں مسترد کریندے ہوئیں مؤقف اختیار کیتے جو دراصل بھارت آپ بیرونِ ملک دہشت گرد کارروائیاں اچ ملوث اے اتے ایندی خفیہ سرگرمیاں دے واضح شواہد موجود ہن۔ اقوامِ متحدہ اچ پاکستان مشن دی کونسلر صائمہ سلیم سلامتی کونسل دے اجلاس اچ بھارتی الزامات دا جواب ݙیندے آکھیے جو کلبھوشن یادیو پاکستان اچ بھارت دی خفیہ کارروائیاں دا ڄیندا ڄاڳدا ثبوت اے۔ بھارتی مندوب ہریش پروتھانی پاکستان تے سرحد پار دہشت گردی دی سرپرستی دا الزام لایا ہئی، جیندے جواب اچ پاکستانی مندوب حقِ جواب استعمال کریندے ہوئیں بھارت دے مؤقف کوں چیلنج کیتے۔ اے بحث سلامتی کونسل اچ “اقوامِ متحدہ دے منشور دے مقاصد اتے اصولاں دے تحفظ اتے اقوامِ متحدہ دے مرکزی عالمی نظام دے استحکام” نال جڑے اجلاس اچ تھئی۔ صائمہ سلیم آکھیا جو جموں و کشمیر بھارت دا اندرونی معاملہ نئیں ٻھل ہک بین الاقوامی تنازع اے جیڑھا آپ بھارت اقوامِ متحدہ اچ ڳھن تے قیا ہئی۔ انہاں آکھیا جو سلامتی کونسل دی قرار داداں تے عمل نہ کر تے بھارت اقوامِ متحدہ دے منشور اتے آرٹیکل 25 دی خلاف ورزی کریندا پئے۔ انہاں سندھ طاس معاہدے کوں معطل رکھݨ دی بھارتی کوشش کوں وی بین الاقوامی قانون دی سنگین خلاف ورزی قرار ݙتے۔ پاکستانی مندوب آکھیا جو بھارت ریاستی سرپرستی اچ دہشت گردی، پراکسیز دے استعمال اتے ماورائے عدالت قتل جھیاں کارروائیاں اچ ملوث اے ٻھل او اپݨے جرائم دے پیرے نئیں لکا سڳدا۔ انہاں حالیہ کوئٹہ ٹرین بم دھماکے دا حوالہ ڈیندے ہوئیں آکھیا جو بلوچ لبریشن آرمی (بی ایل اے) ولوں ذمہ داری قبول کرݨ بھارتی سرپرستی اچ دہشت گردی دی ہک ٻئی مثال اے جیندے اچ معصوم مرد، تریمتیں اتے ٻال نشانہ ٻݨین۔ صائمہ سلیم بھارت اچ مسلماناں، سکھاں، دلتاں اتے عیسائیاں نال روا رکھے ونڄݨ والے سلوک تے وی شدید تنقید کیتی۔ انہاں آکھیا جو ہندوتوا نظریے دے تحت 200 ملین توں ودھ مسلماناں دے خلاف امتیازی اقدامات، ہجوم دا تشدد، مساجد دی مسماری اتے اسلاموفوبک بیانات عالمی برادری دے سامݨے ہن، تاریخ اُنہاں لوکاں کوں یاد رکھیسی جیڑھے عملی طور تے اقوامِ متحدہ دے منشور دا احترام کریندن، نہ کہ اُنہاں کوں جیڑھے صرف لفظاں اچ ایدا ذکر کریندے ہوئیں عملی طور تے ایندی خلاف ورزی کریندن۔