پاکستان اپݨی خودمختاری، سلامتی، وقار اتے حقِ دفاع تے سمجھوتہ نہ کریسی، وزیراعظم محمد شہباز شریف

اسلام آباد۔28 مئی(اے پی پی)وزیراعظم محمد شہباز شریف آکھیے جو 28 مئی 1998 ساݙی قومی تاریخ دا فیصلہ کن لمحہ ہا جݙاں پاکستان ڄڳ تے واضح کر ݙتا جو او اپݨی خودمختاری، سلامتی، وقار اتے دفاع دے حق تے کݙاھیں وی سمجھوتہ نہ کریسی۔ سماجی رابطے دی ویب سائٹ ایکس تے ہک بیان اچ وزیراعظم محمد شہباز شریف آکھیا جو اڄ یومِ تکبیر مناوݨ تے اساں شہید ذوالفقار علی بھٹو کوں زبردست خراجِ عقیدت پیش کریندے ہیں جنہاں پاکستان دے ایٹمی پروگرام دی ٻݨیاد رکھی اتے قائد محمد نواز شریف کوں وی خراجِ تحسین پیش کریندے ہیں جنہاں دی جراتمندانہ، دلیرانہ اتے پُرعزم قیادت مئی 1998 اچ شدید بین الاقوامی دباؤ دے باوجود ایں خواب کوں حقیقت اچ بدل ݙتا۔ وزیراعظم محمد شہباز شریف، ڈاکٹر عبدالقدیر خان، ڈاکٹر ثمر مبارک مند تے انھاں بے شمار ذہین سائنسداناں، انجینئرز، بہادر افواجِ پاکستان دے اہلکاراں اتے ایٹمی پروگرام نال جڑے سارے لوکاں کوں وی خراجِ تحسین پیش کریندے ہیں جنہاں دی لگن، قربانی اتے غیر متزلزل عزم پاکستان دے دفاع کوں ناقابلِ تسخیر ٻݨا ݙتا۔ انھاں آکھیا جو یومِ تکبیر قومی اتحاد، غیر متزلزل عزم اتے قومی طاقت دے عناصر دی اجتماعی قوت دی علامت اے جیہڑا جو پاکستان دی آزادی دے تحفظ دے نال نال خطے اچ امن اتے تزویراتی استحکام کوں یقینی ٻݨاوݨ دے جذبے دی سچائی اے۔ وزیراعظم محمد شہباز شریف آکھیا جو آؤ اساں سارے ایں تاریخی ݙینھ تے ہک مضبوط، خوشحال، متحد اتے خودانحصار پاکستان دی تعمیر دے عہد دی تجدید کروں جیہڑا جو ایمان، اتحاد اتے نظم و ضبط دے اصولاں تے قائم ہووے۔