حج دا چوتھا ݙینھ، حجاج کرام اج تریے شیطاناں دی رمی اچ ردھے ہوئن

منیٰ۔28 مئی(اے پی پی) حج 2026 دے مناسک جاری ہین اتے ایامِ حج دے چوتھے ݙینھ حجاج کرام تریے شیطاناں (جمریاں) دی رمی کریندے پئن۔ ترجمان وزارتِ مذہبی امور دے مطابق حج دا تریجھا فرض طوافِ زیارت اتے واجب سعی دا عمل اڄ وی جاری رہسی، جمرات اتے منیٰ دے 511 چوک توں سعودی شٹل سروس حرم آوݨ ونڃݨ کیتے مسلسل دستیاب اے ڄݙاں جو حجاج کرام اڄ دی رات وی وادیِ منیٰ اچ قیام کریسن۔

وفاقی وزیرِ مذہبی امور سردار محمد یوسف پاکستانی حجاج کوں مشاعرِ مقدسہ اچ نظم و ضبط اتے صفائی دا خصوصی خیال رکھݨ دی ہدایت کیتی اے، منیٰ دے خیمیاں اتے رستیاں تے کولنگ اتے صفائی دے بہترین انتظامات کیتے ڳئن۔ وزیرِ مذہبی امور دے مطابق موسم دی شدت کوں ݙیہدے ہوئیں حجاج کرام کوں ݙوپہر دے اوقات خیمیاں اچ گزارݨ دیاں ہدایات جاری کیتاں ڳئن تاں جو گرمی دے اثرات توں محفوظ رہیا ونڄ سڳے۔ ترجمان وزارتِ مذہبی امور دا آکھݨ اے جو حجاج کرام مکتب دے کڑے تے لڳے کیو آر کوڈ دے ذریعے رستیاں دی درست نشاندہی حاصل کر سڳدن ڄݙاں جو ٻݙھرے حجاج دی رہنمائی کیتے منیٰ دے اہم مقامات تے پاکستان حج مشن دے گائیڈز 24 گھنٹے تعینات ہن۔