پاکستان اقوامِ متحدہ دے امن مشنز سانڳے عالمی امن ودھ موثر ٻݨاوݨ کیتے اپݨا بھرپور تعاون جاری رکھیسی، وزیرِ اعظم شہباز شریف

اسلام آباد۔ 29 مئی (اے پی پی)وزیرِ اعظم شہباز شریف اقوامِ متحدہ دے امن مشنز سانڳے عالمی امن ودھ موثر ٻݨاوݨ کیتے بھرپور تعاون جاری رکھݨ دا پاکستان دا عزم دوہرائے۔ اقوامِ متحدہ امن دستیاں دے عالمی ݙینھ تے اپݨے سنیہے اچ انہاں آکھیا جو اڄ پاکستان اقوامِ عالم نال مل کے اقوامِ متحدہ امن دستیاں دے سپاہیاں کوں بھرپور انداز اچ خراجِ عقیدت پیش کریندے۔ انہاں آکھیا جو عالمی سطح تے ہر سال اے ݙینھ دنیا دے جنگ زدہ علاقیاں اچ اقوامِ متحدہ دے پرچم تلے عسکری، پولیس اتے سویلین دستیاں دی خدمات اتے قربانیاں دے اعتراف اچ منایا ویندے، اے ڈینھ اقوامِ متحدہ دے پہلے امن مشن دے قیام دی یاد کوں وی تازہ کریندے، جئیں 1948 اچ فلسطین اچ اپݨیاں ذمہ داریاں سنبھالین، پاکستان اقوامِ متحدہ دے امن دستیاں کیتے سب توں دیرینہ اتے وڈے شراکت دار ملکاں اچ شامل اے، پاکستان 1960 توں ہݨ تئیں 235,000 اہلکاراں نال 48 توں ودھ امن دستیاں چ اپنی خدمات ݙے چکیے جیندے اچ 500 توں ودھ خواتین اہلکار وی شامل ہن، اے وݙے ماݨ دی ڳالھ اے جو اقوامِ متحدہ دے امن دستیاں کیتے پاکستان پنڄواں وݙا شراکت دار اے، پاکستان کوں اپݨے شہداء اتے اِنھاں بہادر سپوتاں تے ماݨ اے جیڑھے ڄڳ اچ امن، استحکام اتے انسانیت دے تحفظ کیتے اپݨیاں پیشہ ورانہ صلاحیتاں اتے غیر معمولی عزم دے نال خدمات انجام ݙیندے پئن، پاکستان اقوامِ متحدہ دے امن مشنز دے توسط نال عالمی امن کوں مزید مؤثر ٻݨآوݨ کیتے اپݨا بھرپور تعاون جاری رکھیسی، ساݙا اے تعاون عالمی امن و استحکام اتے کثیر الجہتی سفارت کاری اتے ساݙے غیر متزلزل عزم دا عکاس اے۔