چیئرمین سینیٹ سید یوسف رضا گیلانی نال لاہور اچ امریکی قونصل جنرل اسٹیٹسن سینڈرز دی ملاقات

لاہور۔ 30 مئی(اے پی پی)سید یوسف رضا گیلانی نال لاہور اچ امریکی قونصل جنرل اسٹیٹسن سینڈرز ملین۔ انہاں پاکستان۔امریکہ ݙو طرفہ تعلقات، تجارت، سرمایہ کاری اتے علاقائی صورتحال تے ڳالھ مہاڑ کیتی۔ ایں موقع تے چیئرمین سینیٹ پاکستان اتے امریکہ وچال پراݨے تعلقات کوں ٻیا تکڑا ٻݨاوݨ دا عزم دوہرایا اتے آکھیا جو پاکستان امریکہ نال باہمی احترام اتے سانجھے مفادات تے مبنی تعلقات کوں اہمیت ݙیندے۔ انہاں تجارت، آئی ٹی، توانائی، معدنیات، زراعت، تعلیم تے صحت دے شعبیاں اچ تعاون ودھاوݨ تے زور ݙتا۔ خطے اچ امن اتے استحکام کیتے سفارت کاری اتے مذاکرات تے زور ݙیندے چیئرمین سینیٹ آکھیا جو پاکستان خطے دے سارے ملکاں نال تعمیری اتے مثبت تعلقات چاہندے۔ ملاقات اچ پاکستان اتے امریکہ وچال پارلیمانی رابطیاں اتے وفود دے تبادلیاں اچ ودھارے تے اتفاق کیتا ڳیا۔