عرفات منہاس دا نویکلا ریکارڈ: ڈیبیو ون ڈے میچ اچ 5 وکٹاں ڳھنݨ والے پہلے پاکستانی ٻݨ ڳئن

راولپنڈی۔ 30 مئی (اے پی پی)لیفٹ آرم سپنر عرفات منہاس راولپنڈی اچ کھیݙیے ونڄݨ آلے پاکستان اتے آسٹریلیا ون ڈے میچ اچ پاکستان کیتے ہک نویکلا ریکارڈ اپݨے ناویں کیتے۔ انہاں میچ اچ شاندار بالنگ کریندے ہوئے 5 وکٹاں ڳھدن۔ اے انہاں دا ڈیبیو میچ ہا۔ او اپݨے پہلے ہی میچ اچ 5 وکٹاں ڳھنݨ آلے پہلے پاکستانی بالر ٻݨ ڳئن اتے ایں شاندار کارکردگی نال قومی ٹیم اچ بطور آل رائونڈر اپݨی سلیکشن بہترین ثابت کیتی اے۔ ایں توں پہلے کوئی وی پاکستانی بالر ڈیبیو میچ اچ 5 وکٹاں نئیں ڳھن سڳیا ڄݙاں جو سابق کپتان سرفراز نواز، عبدالقادر، ذاکر خان اتے ابرار احمد اینڄھے بالر ہین جنہاں اپݨے ڈیبیو میچ اچ 4، 4 وکٹاں ڳھدن۔ سب توں پہلے فاسٹ بالر سرفراز نواز 1973 اچ نیوزی لینڈ دے خلاف اپݨے ڈیبیو میچ اچ 4 وکٹاں ڳھدن۔ 1983 اچ عبدالقادر نیوزی لینڈ دے خلاف، ذاکر خان 1984 اچ نیوزی لینڈ دے خلاف ڄݙاں جو ابرار احمد 2024  اچ زمباوبے دے خلاف 4 وکٹاں ڳھدن۔