نوجوان نسل کوں تمباکو دے خطرات توں بچاوݨ قومی ذمہ داری اے: صدر آصف زرداری

اسلام آباد۔31 مئی(اے پی پی)صدرِ مملکت آصف علی زرداری آکھیے جو تمباکو دیاں مصنوعات صحت اتے معیشت کیتے سنگین خطرات دا باعث ہین، موجودہ اتے آوݨ والیاں نسلاں کوں تمباکو دیاں مصنوعات دے نقصانات توں بچاوݨ ہک اجتماعی ذمہ داری اے۔ عالمی یومِ انسداد تمباکو نوشی تے صدر آصف علی زرداری آکھیے جو نوجواناں کوں نشے دی لت لاوݨ والیاں اتے موت دے سوداگراں دا مؤثر طریقے نال مقابلہ کرݨ کیتے قانون سازی تے موثر نفاذ ضروری اے، تمباکو دے صحت کیتے نقصانات دو پہلی واری توجہ ݙواوݨ آلیاں ابتدائی تحریراں کوں ہݨ تئیں چار سو سال گزر چکین۔ صدرِ مملکت آکھیے جو کئی ݙھاکیاں توں سائنسی اتے طبی برادری اچ ایں ڳالھ تے اتفاقِ اے جو تمباکو دیاں مصنوعات صحت اتے معیشت کیتے ہک وݙا خطرہ ہین، ڄڳ اچ ہک دے بعد ٻئی آوݨ والیاں حکومتاں سول سوسائٹی نال مل تے تمباکو دے استعمال کوں گھٹ کرݨ کیتے قوانین اتے آگاہی دے اقدامات کیتن، ایندے باوجود، اے پاکستان سودھا پورے ڄڳ اچ عوامی صحت اتے معاشی فلاح و بہبود کیتے ہک سنگین خطرہ ٻݨیا ہویا اے۔ انہاں آکھیے جو عالمی ادارہ صحت دے تخمینے دے مطابق تمباکو دنیا بھر اچ ہر سال 80 لکھ توں ودھ اموات دا موجب ٻݨدے، جیندے اچ کہین ٻئے دے دھوئیں دا شکار تھیوݨ والے تقریباً 16 لکھ لوکاں دیاں اموات وی شامل ہن، اے اعداد و شمار اساکوں عوامی صحت دے ایں وݙے چیلنج دی سنگینی تے دید ٻھنواوݨ تے مجبور کریندن جیڑھا لکھاں لوکاں اتے خانداناں کوں مسلسل متاثر کریندا پئے۔ انہاں آکھیے جو ٻال اتے نوجوان ایںدا خاص طور تے شکار تھیندے پئن، تمباکو اتے نکوٹین دی صنعت نویں نسلاں کوں اینجھیاں بدلدیاں ہویاں مصنوعات اتے مارکیٹنگ دے طریقیاں دے ذریعے نشانہ ٻݨیدی پئی اے جیڑھیاں لت لاوݨ اتے ایکوں برقرار رکھݨ کیتے ڈیزائن کیتاں ڳئن، کم عمری اچ نکوٹین دا استعمال عمر بھر دی وابستگی اتے صحت دے منفی نتائج دے خطرے کوں ودھا ݙیندے۔ صدر مملکت آکھیے جو جدید تحقیق دے مطابق عالمی سطح تے پاکستان اچ سگریٹ، ای سگریٹ، ویپنگ ڈیوائسز، نکوٹین پاؤچز اتے ٻیاں نکوٹین مصنوعات دا استعمال عوامی صحت دے ودھدے خدشات دا باعث اے اتے نینگراں اچ وی متبادل منشیات دے استعمال دے شواہد ملدن۔ آنہاں آکھیے جو نوجواناں کوں بچاوݨ کیتے مضبوط آگاہی مہمات، قوانین اتے روک تھام دیاں کوششاں ضروری ہین، کم عمری اچ نکوٹین دا استعمال عمر بھر دی محتاجی، صحت دے منفی نتائج اتے مستقبل دے محدود مواقع دے خطرے کوں ودھائے، ہر پاسو کھنݙیے ہوئے “سیکنڈ ہینڈ سموک” نال ٻال دمہ، نمونیا، کن دے انفیکشن، پیدائشی گھٹ وزن اتے اچانک موت جھیں خطرات دا زیادہ شکار تھیندے پئن، ایںدا اثر صرف صحت تئیں محدود کینی، بھل اے خانداناں اتے نظامِ صحت تے وی ہک بھار سٹیندے۔