مضبوط خاندانی اقدار تے قائم معاشرہ قومی ترقی، اتحاد تے سماجی ہم آہنگی دی ضمانت ہوندے، چیئرمین سینیٹ دا عالمی یومِ والدین دے موقع تے پیغام

اسلام آباد۔ 1 جون (اے پی پی) چیئرمین سینیٹ سید یوسف رضا گیلانی عالمی یومِ والدین دے موقع تے والدین دی بے لوث محبت، قربانیاں تے نسلاں دی تربیت وچ انہاں دے عظیم کردار کوں خراجِ تحسین پیش کیتا۔ اپݨے پیغام وچ چیئرمین سینیٹ آکھیا جو والدین مضبوط خانداناں تے خوشحال قوماں دی بنیاد ہن، جنہاں دی شفقت، دانائی تے بے مثال قربانیاں نویں نسلاں دی کردار سازی تے بہتر معاشرے دی تشکیل وچ بنیادی کردار ادا کریندن۔ انہاں آکھیا جو اسلام وچ والدین کوں ٻہوں اُچا تے خصوصی مقام حاصل اے تے دینِ اسلام کئی واری والدین نال حسنِ سلوک، احترام تے اطاعت دی تلقین کریندے۔ انہاں قرآنِ پاک دی تعلیمات دا حوالہ ݙیندے آکھیا جو اللہ تعالیٰ والدین نال نرمی، شفقت تے عزت و احترام نال پیش آوݨ دا حکم ݙتے تے انہاں دے سامݨے عاجزی اختیار کرݨ دی تاکید فرمائی اے۔ چیئرمین سینیٹ آکھیا جو خصوصاً ٻڈھیپے وچ والدین دی خدمت تے ݙیکھ بھال نہ صرف اخلاقی ذمہ داری بلکہ دینی فریضہ وی اے۔ انہاں آکھیا جو حضرت محمد ﷺ دی تعلیمات دے مطابق والدین دی خدمت عظیم ترین نیکیاں وچ شمار تھیندی اے تے اے دنیا و آخرت وچ کامیابی، رحمت تے برکت دا ذریعہ بݨدی اے۔ سید یوسف رضا گیلانی والدین دے احترام، معاونت تے انہاں دی قدر کرݨ دی اہمیت تے زور ݙیندے آکھیا جو مضبوط خاندانی اقدار تے قائم معاشرہ قومی ترقی، اتحاد تے سماجی ہم آہنگی دی ضمانت ہوندے۔ انہاں بالخصوص نوجوان نسل تے زور ݙتا جو او اپݨے والدین دی قربانیاں کوں تسلیم کرن، انہاں کیتے شکر گزاری دا اظہار کرن تے محبت، صبر، خدمت تے احترام دی انہاں اقدار کوں ودھارا ݙیون جیڑھی ساݙی ثقافتی روایات تے اسلامی تعلیمات دا اہم حصہ ہن۔ چیئرمین سینیٹ آکھیا جو والدین دی عزت و تکریم خاندانی نظام کوں مضبوط بݨیندی اے، جیڑھا ہک ہمدرد، مستحکم تے خوشحال معاشرے دی بنیاد اے