پاکستان پیپلز پارٹی میٹروپولیٹن کارپوریشن بہاولپور دے زیرِاہتمام عید ملن پارٹی دا انعقاد

اسلام آباد۔ یکم جون(اے پی پی)پاکستان پیپلز پارٹی میٹروپولیٹن کارپوریشن بہاولپور دے زیرِ اہتمام پارٹی عہدیداران دے اعزاز اچ عید ملن پارٹی دا انعقاد کیتا ڳیا جیندے اچ پارٹی رہنماواں تے کارکنان بھرپور شرکت کیتی۔ تقریب خوشگوار تے پُرجوش ماحول اچ منعقد تھئی جتھاں عید دیاں خوشیاں ہک ٻئے نال ونڈݨ دے نال نال پارٹی امور، تنظیمی معاملات تے کارکنان کوں درپیش مسائل تے وی تفصیلی ڳالھ مہاڑکیتی ڳئی۔تقریب توں خطاب کریندے صدر ملک امتیاز چنڑ آکھیا جو پاکستان پیپلز پارٹی دی بنیاد عوامی خدمت، جمہوریت تے کارکناں دیاں قربانیاں تے قائم اے۔ انہاں آکھیا جو پارٹی کارکنان ہی اصل سرمایہ ہن تے انہاں دی عزت، احترام تے مسئلیں دا حل قیادت دی اولین ترجیح اے۔ انہاں ایں عزم دا اظہار کیتا جو کارکنان کوں درپیش تنظیمی، معاشی تے سیاسی مسئلیں دے حل کیتے ہر ممکن اقدامات کیتے ویسن تے کارکناں کوں فیصلہ سازی دے عمل اچ بھرپور نمائندگی ݙتی ۔ ملک امتیاز چنڑ آکھیا جو تنظیم کوں مزید فعال تے مضبوط بݨاوݨ کیتے یونین کونسل تے وارڈ دی سطح تئیں تنظیمی ڈھانچے کوں مؤثر بݨایا ویسی تاں جو کارکنان تے قیادت وچال رابطے کوں مزید بہتر کیتا ونڄ سڳے۔ انہاں آکھیا جو پارٹی دے نظریاتی تے پراݨے کارکناں کوں نظرانداز کائناں کیتا ویسی بلکہ انہاں دیاں خدمات تے قربانیاں سامݨے رکھیندے انہاں کوں مناسب مقام ݙتا ویسی۔ انہاں کارکنان تے زور ݙتا جو او پارٹی پیغام کوں گھر گھر پڄاوݨ تے عوامی مسئلیں دے حل کیتے اپݨا کردار ادا کرن۔مہمانِ خصوصی سابق ضلعی صدر بہاولپور تے سینئر رہنما ریاض خان ڈاہر ایڈووکیٹ آکھیا جو پیپلز پارٹی ہمیشہ کارکن دوست جماعت رہی اے تے کارکناں دی جدوجہد ہی پارٹی دی اصل طاقت اے۔ انہاں آکھیا جو پارٹی کوں درپیش چیلنجز دا مقابلہ اتحاد، نظم و ضبط تے تنظیمی استحکام دے ذریعے کیتا ونڃ سڳدے۔صدرِ تقریب پیپلز لائرز فورم جنوبی پنجاب دے نائب صدر طاہر مفتی ایڈووکیٹ آکھیا جو کارکنان ہر دور اچ پارٹی پرچم بلند رکھیے، صوبائی نائب صدر راؤ طارق آکھیا جو قیادت کوں چاہیدے جو کارکنان دے جائز مسئلیں کوں ترجیحی بنیاداں تے حل کرے۔ صوبائی نائب صدر اقلیتی ونگ پیٹر جان مٹو تنظیمی رابطیں کوں مزید مؤثر بݨاوݨ دی لوڑھ تے زور ݙتا۔ضلعی صدر پیپلز لائرز فورم رائے عتیق نظامی ایڈووکیٹ آکھیا جو عید ملن پارٹی دا مقصد صرف عید دیاں خوشیاں اچ شرکت نی بلکہ کارکنان دے نال براہِ راست رابطہ تے انہاں دے مسئلیں توں آگاہی حاصل کرݨا وی اے۔ ضلعی صدر انسانی حقوق ونگ کلیم اللہ ایڈووکیٹ آکھیا جو مضبوط تنظیم ہی پارٹی دی کامیابی دی ضامن ہوندی اے۔ ڈویژنل نائب صدر بہاولپور صاحبزادہ عاصم عباسی اپݨے خطاب اچ آکھیا جو نوجوان کارکنان کوں اڳوں گھن آوݨ تے انہاں کوں پارٹی دیاں سرگرمیاں اچ مؤثر کردار ݙیوݨ دی لوڑھ اے تاں جو پارٹی مزید مضبوط تے متحرک تھی سڳے۔تقریب توں ڈویژنل صدر خواتین ونگ صاحبزادی سائرہ عباسی، صوبائی نائب صدر لیبر ونگ عامر راجپوت، شہلا فیاض، ملک اسحاق ایڈووکیٹ، نذیر بھٹہ ایڈووکیٹ، رانا شہزاد، ملک اجمل جوئیہ تے کامران علی وی خطاب کیتا جݙاں جو تقریب دی نظامت دی ذمہ داری انفارمیشن سیکرٹری سٹی محمد آصف بھارہ ایڈووکیٹ ادا کیتی۔ تقریب اچ ڈویژنل ڈپٹی انفارمیشن سیکرٹری عبد الحنان اختر، ملک شفقت ایڈووکیٹ، تحصیل صدر احمد پور جام یعقوب جھلݨ، ملک زمرد چنڑ، احمد داؤد چوہان ایڈووکیٹ، حسنین کلیم اللہ ایڈووکیٹ، ملک اقبال، رانا محبوب عالم، خواجہ ولید، انور جی، ملک طاہر اعوان ایڈووکیٹ، ملک ایاز ایڈووکیٹ، حاجی عطاء، مظہر عباس، ظہور کھوکھر سودھے پارٹی عہدیداران دی کثیر تعداد شرکت کیتی۔تقریب دے دوران کارکنان اپݨے تنظیمی مسائل، مقامی سطح تے درپیش مشکلات تے پارٹی سرگرمیاں دے حوالے نال تجویزاں وی پیش کیتیاں۔ رہنماواں یقین ݙیوائے جو کارکنان دے تحفظات تے مسائل کوں اعلیٰ قیادت تئیں پڄایا ویسی تے انہاں دے حل کیتے عملی اقدامات کیتے ویسن۔ تقریب دے چھیکڑ تے شرکاء ہک ٻئے کوں عید دی مبارخ ݙتی، ملکی سلامتی، استحکام تے خوشحالی کیتے خصوصی دعا کیتی ڳئی جݙاں جو پاکستان پیپلز پارٹی کوں مزید مضبوط تے فعال بݨاوݨ دے عزم دا اعادہ وی کیتا گیا۔(ڈاکٹر سعدیہ کمال)