وفاقی وزیرصحت دی زیرِ صدارت اعلیٰ سطحی اجلاس

اسلام آباد۔ 1 جون (اے پی پی) وفاقی وزیرِ صحت مصطفیٰ کمال دی زیرِ صدارت وزارتِ قومی صحت وچ ہک اعلیٰ سطحی اجلاس منعقد تھیا، جیندے وچ وفاقی سیکرٹری صحت، ایڈیشنل سیکرٹری، سی ای او ڈریپ، سی ای او نیشنل انسٹیٹیوٹ آف ہیلتھ (این آئی ایچ) سودھے وزارتِ صحت دے سینئر حکام شرکت کیتی۔ اجلاس وچ جنیوا وچ منعقدہ ورلڈ ہیلتھ اسمبلی دے دوران تھیوݨ آلیاں اہم ملاقاتاں، فیصلیں تے بین الاقوامی شراکت داریاں تے عملدرآمد دے حوالے نال پیش رفت دا تفصیلی جائزہ ڳھدا گئے۔ ایں موقع تے وفاقی وزیرِ صحت مصطفیٰ کمال ہدایت کیتی جو عالمی سطح تے کیتے ڳئے وعدیں تے قائم تھیوݨ آلیاں شراکت داریاں کوں وقتی تے مؤثر انداز وچ عملی شکل ݙتی ونڄے تاں جو پاکستان دے صحت دے شعبے کوں زیادہ توں زیادہ فیدہ پڄایا ونڄ سڳے۔ اجلاس وچ پاکستان وچ ویکسین دی مقامی سطح تے تیاری دے حوالے نال جاری پیش رفت تے وی غور کیتا ڳیا۔ وزیرِ صحت ہدایت کیتی جو انڈونیشیا دے نال ویکسین سازی دے شعبے وچ تھیوݨ آلے معاہدے کوں حتمی شکل ݙیوݨ کیتے سارے ضروری اقدامات وقتی مکمل کیتے ونڄن۔ مصطفیٰ کمال آکھیا جو ویکسین دی مقامی تیاری کیتے انڈونیشیا پاکستان دا ہک اہم تے قابلِ اعتماد شراکت دار اے۔ انہاں ڈریپ تے نیشنل انسٹیٹیوٹ آف ہیلتھ کوں ہدایت کیتی جو مقامی سطح تے ویکسین دی تیاری دے سارے ضروری مرحلے تے انتظامات کوں تکھا کیتا ونڄے۔ وفاقی وزیرِ صحت آکھیا جو ملک وچ 13 اہم بیماریاں دے خلاف ویکسین دی مقامی تیاری ویلھے دی اہم لوڑھ بݨ چکی اے، جیندے نال نہ صرف قومی صحت دے نظام کوں تکڑا بݨایا ونڄ سڳسی بلکہ ویکسین دی دستیابی تے خود کفالت وچ وی ودھارا تھیسی۔ اجلاس وچ گاوی دے تحت جاری ویکسین پروگرامز دی مستقبل دی فنڈنگ تے پائیداری دے مختلف پہلوواں تے وی غور کیتا ڳیا۔ نیشنل ہیلتھ سپورٹ پروگرام دی پیش رفت دا جائزہ گھندے وزیرِ صحت اینکوں حکومت دا فلیگ شپ پروگرام قرار ݙتا تے آکھیا جو ایں پروگرام دے ذریعے عوام کوں معیاری تے بہتر صحت دی سہولتاں ݙیوݨ یقینی بݨایا ویسی۔ انہاں ایں عزم دا اعادہ کیتا جو وزارتِ صحت عوام دی فلاح و بہبود تے صحت دے شعبے وچ پائیدار اصلاحات کیتے سارے دستیاب وسائل بروئے کار گھن آسی