ترقیاتی بجٹ تے شدید دٻاؤ پاروں غیر ضروری منصوبیں دی گنجائش ختم تھیندی پئی اے، پی ایس ڈی پی دا حجم 1126 ارب روپے رکھیا ویندا پئے، احسن اقبال

اسلام آباد۔ 1 جون (اے پی پی) وفاقی وزیر منصوبہ بندی، ترقی و خصوصی اقدامات احسن اقبال آکھیے جو ملک دا وݙا مالیاتی حصہ قرضیں دی ادائیگی تے خرچ تھیندا پئے جیندے پاروں ترقیاتی بجٹ شدید دٻاؤ دا شکار اے، جݙاں جو غیر اہم ترقیاتی منصوبیں کوں جاری رکھݨ وفاق کیتے اوکھے توں اوکھا تر تھیندا ویندے۔ سالانہ پلان کوآرڈینیشن کمیٹی دے اجلاس دی صدارت تے بعد میڈیا نال ڳالھ کریندے انہاں آکھیا جو گزریل اٹھ سالاں توں وفاقی ترقیاتی بجٹ جمود دا شکار اے تے اڄ وی تقریباً اوہو سطح برقرار اے جیڑھی 2018 وچ ہئی۔ انھاں دا آکھݨ ہئی جو جاری ترقیاتی منصوبیں دی تکمیل کیتے تقریباً 10 ہزار ارب روپے درکار ہن، جݙاں جو مختلف وزارتاں آندے مالی سال کیتے جاری منصوبیں دی مد وچ 4 ہزار ارب روپے دی درخواست کیتی اے، تاں جو مالی وسائل دی محدود دستیابی پاروں اے طلب پوری کائناں کیتی ونڄ سڳسی۔ احسن اقبال آکھیا جو وفاق تے صوبیں دے ترقیاتی بجٹ وچ نمایاں فرق پیدا تھی چکے۔ گزریل اٹھ سالاں دے دوران صوبیں دا ترقیاتی بجٹ ہک ہزار ارب روپے توں ودھ تے ترائے ہزار ارب روپے تئیں پڄ ڳیا، جݙاں جو وفاقی ترقیاتی بجٹ تقریباً ہک ہزار ارب روپے دی سطح تے ہی موجود اے۔ انہاں اعلان کیتا جو آندے مالی سال دے ترقیاتی پروگرام دا حجم 1126 ارب روپے رکھیا ویندا پئے۔ آزاد کشمیر تے گلگت بلتستان کیتے 153 ارب روپے مختص کیتے ویسن۔ انھاں دا آکھݨ ہئی جو آزاد کشمیر تے گلگت بلتستان کوں قومی مالیاتی کمیشن (NFC) وچ حصہ ملݨا چاہیدے تے وفاق اپݨے این ایف سی حصے توں انھاں علاقیں دی مالی معاونت جاری رکھیسی۔ وفاقی وزیر آکھیا جو حکومت بلوچستان دی ترقی کوں خصوصی اہمیت ݙیندی پئی اے تے آندے بجٹ وچ بلوچستان کیتے 100 ارب روپے مالیت دے منصوبے شامل کرݨ دی تجویز اے۔ انہاں ݙسایا جو این-25 شاہراہ کیتے 25 ارب روپے مختص کرݨ دی منصوبہ بندی کیتی ویندی پئی اے، جݙاں جو اتحادی جماعتاں دی طرفوں تجویز کیتی ڳئے 87 ارب روپے دے ترقیاتی منصوبیں تے وی توجہ ݙتی ویسی۔ معاشی صورتحال تے ڳالھ کریندے احسن اقبال آکھیا جو حکومت غیر یقینی تے عارضی معاشی نمو دے بجائے پائیدار تے مستحکم ترقی تے یقین رکھیندی اے۔ انھاں موجب خرچیں وچ غیر معمولی اضافہ وقتی طور تے ترقی دی رفتار ودھا سڳدے لیکن ایجھی ترقی دیرتئیں کائنی تھیندی۔ انہاں زور ݙتا جو پاکستان دی پائیدار معاشی ترقی کیتے برآمدات وچ ودھارا ناگزیر اے۔ انہاں آکھیا جو زراعت دے شعبے دی جدید خطوط تے ترقی حکومت دی ترجیحات وچ شامل اے تے سی پیک فیز ٹو دے تحت زرعی تحقیق تے جدید تکنیکاں دے ودھارے کیتے پاکستانی ماہرین کوں چین وچ تربیت ݙتی ویندی پئی اے۔ ایں سلسلے وچ ہک ہزار زرعی ماہرین دی تربیت دا پروگرام جاری اے۔ احسن اقبال آکھیا جو 2019 توں 2022 دے دوران ڳھدے ڳئے بارے قرضیں دی ادائیگی کیتے ہݨ وݙیاں رقماں مختص کرݨیاں پوندیاں پئن، جیندے توں ترقیاتی خرچے متاثر تھیندے پئن۔ تاں جو حکومت معاشی استحکام دے میدان وچ اہم کامیابیاں حاصل کیتین۔ انہاں ݙسایا جو افراطِ زر دی شرح کوں ڈٻل ڈیجٹ توں سنگل ڈیجٹ تئیں گھن آوݨ ہک وݙی کامیابی اے، اگرچہ مشرقِ وسطیٰ وچ جاری بحران پاروں مہانگ تے دٻاؤ برقرار رہیا۔ انہاں آکھیا جو اڄوکے مالی سال جولائی توں اپریل مہانگ دی اوسط شرح 6.2 فیصد رہی، جݙاں جو ترسیلاتِ زر 34 ارب ڈالر تئیں پڄ چکئن۔ اپریل 2026 تئیں پاکستان دے زرمبادلہ دے ذخائر 21.3 ارب ڈالر دی سطح تے موجود ہن۔ وفاقی وزیر آکھیا جو وزیراعظم شہباز شریف دی قیادت وچ شرحِ سود 23 فیصد توں گھٹ تھی تے 10 فیصد تئیں آ چکی اے۔ وزیراعظم ایجھی معاشی ترقی چاہندن جیڑھی مضبوط، متوازن تے پائیدار ہووے تے جیندیاں بنیاداں برآمدات، پیداواری شعبیں دی ترقی تے سرمایہ کاری دے ودھارے تے ہوون