وزیراعظم دی ایف بی آر کوں 15 جون تئیں ٹیکس ریفنڈ دے سارے زیرِ التواء کیسز نبیڑݨ دی ہدایت، مسلسل محنت نال معیشت کوں استحکام ملیا، تکھے معاشی ترقی کیتے کوششاں جاری رکھیسوں، شہباز شریف

اسلام آباد۔ 1 جون (اے پی پی) وزیراعظم محمد شہباز شریف ایف بی آر کوں 15 جون تئیں ٹیکس ریفنڈ دے سارے زیرِ التواء کیسز نبیڑݨ دی ہدایت کریندے آکھیے جو مسلسل محنت نال معیشت کوں استحکام ملیا، تکھے معاشی ترقی کیتے کوششاں جاری رکھیسوں، صنعتی ترقی تے پیداوار ودھاوݨ کیتے آندے بجٹ اچ مزید اقدامات چیسوں۔ وزیراعظم دفتردے میڈیا ونگ توں جاری بیان موجب وزیراعظم محمد شہباز شریف نال ملک دے چیمبر آف کامرس اینڈ انڈسٹری دی اعلیٰ قیادت دے وفد اتھاں ملاقات کیتی۔ وفد وزیراعظم کوں آندے بجٹ تے ملک دی مجموعی معاشی ترقی دے حوالے نال تجاویز پیش کیتیاں۔ وفد نال ڳالھ کریندے وزیراعظم آکھیا جو مسلسل محنت نال معیشت کوں استحکام ملیا، تکھے معاشی ترقی کیتے کوششاں جاری رکھیسوں۔ انہاں آکھیا جو صنعتی ترقی تے پیداوار ودھاوݨ کیتے آندے بجٹ اچ مزید اقدامات چیسوں۔ وزیراعظم ایف بی آر کوں 15 جون تئیں ٹیکس ریفنڈ دے سارے زیرِ التواء کیسز نبیڑݨ دی ہدایت کریندے آکھیا جو برآمدات تے مبنی معاشی ترقی ساݙا مشن اے تے اجتماعی کوششاں نال ایں مشن دی تکمیل کوں یقینی بݨیسوں۔انہاں آکھیا جو پالیسی ریٹ اچ اڄوکے ودھارے دے باوجود ایکسپورٹ ری فائنانس سکیم دی شرح جون 2027ء تئیں 4.5 فیصد تے برقرار رہسی، برآمد کنندگان دی سہولت کیتے بینکاں دا اے فیصلہ قابلِ تحسین اے۔ وزیراعظم کاروباری برادری دی سہولت کیتے پاکستان ریونیو آٹومیشن لمیٹڈ (پرال) دا مرکزی دفتر کراچی منتقل کرݨ دی ہدایت کیتی۔ انہاں ٻاہرلے ملک رہݨ آلے پاکستانیاں تے کاروباری برادری دی درخواست تے گجرات اچ پاسپورٹ دا دفتر کھولݨ دی ہدایت وی کیتی۔ وزیراعظم آکھیا جو ایس ایم ای سیکٹر دی ترقی کیتے اصلاحات تے سہولتاں ݙیوݨ ساݙے معاشی ایجنڈے دا اہم حصہ اے۔ انہاں زور ݙتا جو پاکستانی سرمایہ کار جوائنٹ وینچرز دے ذریعے الیکٹرک وہیکلز دی مقامی پیداوار کوں ودھارا ݙیون۔ وفد دے شرکا وزیراعظم، نائب وزیراعظم و وزیرِ خارجہ سینیٹر محمد اسحاق ڈار تے آرمی چیف و چیف آف ڈیفنس فورسز فیلڈ مارشل سید عاصم منیر دی خلیج دی کشیدہ صورتحال اچ امن کوں ودھارا ݙیوݨ دی کوششاں دی تعریف کریندے آکھیے ملک دی کاروباری برادری پاکستان دی معاشی ترقی تے روزگار اچ ودھارے کیتے حکومت دے نال کھڑی اے۔ وفد پسماندہ تے متوسط طبقے کیتے ’’وزیراعظم اپݨا گھر پروگرام‘‘ دے تحت سوکھیاں شرطاں تے قرضہ سکیم دے اجراء دا خیرمقدم کیتا۔ وفد ایکسپورٹ ڈویلپمنٹ فنڈ دے بورڈ اچ اصلاحات، پی آئی اے دی کامیاب نجکاری، ایف بی آر دی ڈیجیٹائزیشن تے ای-انوائسنگ جیھے اقدامات تے وزیراعظم دا شکریہ ادا کیتا۔ وفد دے ارکان آکھیا جو گرے اکانومی کوں ڈیجیٹائزیشن تے ٻنہاں اصلاحات دے ذریعے فارمل اکانومی دے دائرہ کار اچ گھن آوݨ کیتے کاروباری برادری حکومتِ پاکستان دے نال بھرپور تعاون کریسی۔مشاورتی اجلاس اچ ایف پی سی سی آئی، کراچی، لاہور، راولپنڈی، اسلام آباد، سرحد، کوئٹہ، گجرات، گوجرانوالہ تے سیالکوٹ چیمبرز دے صدور سودھے اعلیٰ قیادت شریک تھئی۔ اجلاس اچ وفاق وزراء رانا تنویر حسین، محمد اورنگزیب، عطاء اللہ تارڑ، علی پرویز ملک، اویس احمد خان لغاری، وزیرِ مملکت خزانہ بلال اظہر کیانی، گورنر سٹیٹ بینک جمیل احمد، چیئرمین ایف بی آر تے اعلیٰ سرکاری حکام شرکت کیتی۔