نائب وزیراعظم اسحاق ڈار دی دعوت تے یورپی کمیشن دی نائب صدر کاجا کالاس دا پاکستان-یورپی یونین سٹریٹجک ڈائیلاگ دے اٹھویں اجلاس دی مشترکہ صدارت کیتے اسلام آباد دا دورہ

اسلام آباد۔ 1 جون (اے پی پی) نائب وزیراعظم و وزیرِ خارجہ سینیٹر محمد اسحاق ڈار دی دعوت تے یورپی یونین دی اعلیٰ نمائندہ برائے خارجہ امور و سلامتی پالیسی تے یورپی کمیشن دی نائب صدر کاجا کالاس پاکستان-یورپی یونین سٹریٹجک ڈائیلاگ دے اٹھویں اجلاس دی مشترکہ صدارت کیتے اسلام آباد دا دورہ کیتا۔ ایں ڈائیلاگ پاکستان تے یورپی یونین دے تعلقات دے سارے پہلوواں دا جائزہ گھنݨ، سٹریٹجک انگیجمنٹ پلان دے تحت تھیوݨ آلی پیش رفت دا اندازہ لاوݨ تے ݙوطرفہ تعاون کوں مزید وسعت ݙیوݨ کیتے آندے دا لائحہ عمل طے کرݨ دا موقع ݙتا۔ دفترِ خارجہ توں جاری ہک بیان موجب وزارتِ خارجہ اچ وفد دی سطح تے تھیوݨ آلے تفصیلی مذاکرات دے دوران ݙوہیں فریقین اپݨی کثیر جہتی شراکت داری کوں مزید مضبوط بݨاوݨ دے عزم دا اعادہ کیتا۔ مذاکرات اچ تجارت تے اقتصادی تعاون دے ودھارے بالخصوص جی ایس پی پلس (GSP+) فریم ورک دے تحت تعاون اچ وسعت تے ݙوطرفہ سرمایہ کاری دے ودھارے تے توجہ مرکوز رہی۔ ایں ضمن اچ اپریل 2026ء اچ اسلام آباد اچ منعقد تھیوݨ آلے پہلے یورپی یونین-پاکستان بزنس فورم دی کامیابی دی وی تعریف کیتی ڳئی ۔ݙوائیں اڳواݨاں پاکستان-یورپی یونین مائیگریشن اینڈ موبیلیٹی ڈائیلاگ دے تحت جاری تعاون دا وی جائزہ ڳھدا۔ ݙوہیں پاسوں قانونی ہجرت دے موقع تے ٹیلنٹ پارٹنرشپس دے ودھارے دی اہمیت تے زور ݙتا ڳیا جݙاں جو منظم طریقہ کار دے ذریعے غیر قانونی ہجرت دے مؤثر تدارک تے وی اتفاق کیتا ڳیا۔ نائب وزیراعظم و وزیرِ خارجہ تے یورپی یونین دی اعلیٰ نمائندہ سانجھی دلچسپی دے علاقائی تے عالمی امور تے وی تفصیلی ڳالھ مہاڑ کیتی۔ نائب وزیراعظم علاقائی امن تے استحکام دے ودھ ارے اچ پاکستان دے تعمیری تے سہولت کار کردار تے روشنی پاتی۔ یورپی یونین پاکستان دی ثالثی دی کوششاں دی تعریف  کریندے انھاں دی قدر دانی دا اعادہ کیتا۔ ݙوہیں فریقین عالمی چیلنجز نال نبٹݨ تے علاقائی استحکام برقرار رکھݨ کیتے مکالمے، بین الاقوامی قانون دی پاسداری تے کثیرالجہتی تعاون دی اہمیت تے زور ݙتا۔ دورہ پاکستان دے دوران کاجا کالاس وزیراعظم محمد شہباز شریف تے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نال وی ملاقات کیتی۔ انہاں ملاقاتاں اچ ݙوہیں پاسوں دی قیادت ݙوطرفہ تعلقات اچ مثبت پیش رفت تے اطمینان دا اظہار کیتا، علاقائی صورتحال تے ڳالھ مہاڑ کیتی تے اعلیٰ سطحی رابطیں دے تسلسل دی اہمیت تے زور ݙتا۔ یورپی یونین دی اعلیٰ نمائندہ دے ایں دورے پاکستان تے یورپی یونین وچال شراکت داری کوں مزید مستحکم بݨاوݨ اچ اہم کردار ادا کیتا تے سانجھی دلچسپی دے سارے شعبیں اچ تعاون کوں مزید ودھاوݨ دا موقع ݙتا۔ ݙوہیں فریقین اتفاق کیتا جو پاکستان-یورپی یونین سٹریٹجک ڈائیلاگ دا نواں اجلاس آندے سال برسلز اچ منعقد کیتا ویسی۔