وزیراعظم نال یورپی کمیشن دی نائب صدر کاجا کالاس دی ملاقات

اسلام آباد۔ 1 جون (اے پی پی) وزیراعظم محمد شہباز شریف پاکستان تے یورپی یونین وچال تکڑے تجارتی تعلقات دے ودھارے اچ جی ایس پی پلس دی اہمیت کوں اجاگر کریندے آکھیے جو پاکستان یورپی یونین دے نال کثیر الجہتی شراکت داری کوں مزید تکڑا بݨاوݨ چاہندے۔ وزیراعظم محمد شہباز شریف نال یورپی یونین دی خارجہ امور تے سلامتی پالیسی دی اعلیٰ نمائندہ تے یورپی کمیشن دی نائب صدر کاجا کالاس اتھاں وزیراعظم ہاؤس اچ ملاقات کیتی۔ وزیراعظم دفتردے میڈیا ونگ توں جاری بیان موجب نائب وزیراعظم و وزیرِ خارجہ سینیٹر محمد اسحاق ڈار، وفاقی وزیرِ قانون، انصاف و انسانی حقوق سینیٹر اعظم نذیر تارڑ، اٹارنی جنرل آف پاکستان منصور عثمان اعوان، وزیراعظم دے معاونِ خصوصی طارق فاطمی تے ٻئےاعلیٰ حکام وی ملاقات اچ موجود ہن۔وزیراعظم یورپی یونین دی اعلیٰ نمائندہ دا خیرمقدم کریندے آکھیا جو پاکستان یورپی یونین دے نال کثیر الجہتی شراکت داری کوں مزید تکڑا بݨاوݨ چاہندے۔ انہاں یورپی یونین-پاکستان سٹریٹجک ڈائیلاگ دے اٹھویں دور دے انعقاد تے اطمینان دا اظہار کریندے تجارت و سرمایہ کاری، موسمیاتی تبدیلی، سلامتی، ہجرت، پائیدار ترقی تے رابطہ کاری سودھےاہم شعبیں اچ یورپی یونین دے نال تعاون کوں مزید ودھارا ݙیوݨ دے پاکستان دے عزم دا اعادہ کیتا۔ ایں ضمن اچ وزیراعظم پاکستان تے یورپی یونین وچال تکڑے تجارتی تعلقات دے ودھارے اچ جی ایس پی پلس دی اہمیت کوں اجاگر کیتا۔ملاقات اچ علاقائی تے بین الاقوامی صورتحال تے وی تفصیلی ڳالھ مہاڑ تھئی ۔ وزیراعظم خلیج اچ امن دے ودھارے کیتے پاکستان دی کوششاں دی یورپی یونین دی طرفوں بھرپور حمایت تے یورپی یونین دی قیادت دا شکریہ ادا کریندے آکھیا جو نائب وزیراعظم محمد اسحاق ڈار تے فیلڈ مارشل سید عاصم منیر ایں سلسلے اچ اہم کردار ادا کریندے پئن۔ وزیراعظم خطے اچ پائیدار امن دے قیام کیتے بین الاقوامی برادری بشمول یورپی یونین، دی اجتماعی کوششاں دی لوڑھ تے خصوصی زور ݙتا۔ وزیراعظم جنوبی ایشیا دی علاقائی صورتحال تے افغانستان متعلق پاکستان دے موقف توں وی یورپی یونین دی اعلیٰ نمائندہ کوں ݙسایا ۔ انہاں یورپی کونسل دے صدر انتونیو کوسٹا تے یورپی کمیشن دی صدر ارسولا وان ڈیر لاین کیتے اپݨی نیک تمناواں دا اظہار کیتا تے ݙوہیں اڳواݨاں کوں وقتی پاکستان دے دورے دی اپݨی پرخلوص دعوت دا اعادہ کیتا۔ یورپی یونین دی اعلیٰ نمائندہ کاجا کالاس علاقائی امن کیتے پاکستان دے کردار دی تعریف کیتی تے پاکستان دے نال سٹریٹجک رابطے کوں مزید ودھاوݨ اچ یورپی یونین دی گھاٹی دلچسپی دا اظہار کیتا۔