بین الاقوامی جھیڑیں دے حل کیتے ثالثی کوں ودھارا ݙتا ونڄے ، اقوامِ متحدہ اچ پاکستان دے مستقل مندوب دا جنرل اسمبلی اچ مباحثے توں خطاب

اقوامِ متحدہ۔ 2 جون (اے پی پی) پاکستان زور ݙتے جو طویل عرصے توں جاری بین الاقوامی جھیڑیں دے حل کیتے ثالثی کوں ودھارا ݙتا ونڄے تے اِنھاں جھیڑیں کوں اقوامِ متحدہ دی قرارداداں موجب حل کیتا ونڄے تاں جو انصاف تے پائیدار امن کوں یقینی بݨایا ونڃ سڳے۔ اے ڳالھ اقوامِ متحدہ اچ پاکستان دے مستقل مندوب عاصم افتخار احمد گزریل ݙینھ اقوامِ متحدہ دی جنرل اسمبلی اچ ’’جھیڑیں دے پرامن حل، جھیڑے روکݨ تے حل اچ ثالثی دے کردار کوں مضبوط بݨاوݨ‘‘ دے موضوع تے مباحثے توں خطاب کریندے آکھی۔ انہاں آکھیا جو ثالثی دا عمل جلدی شروع ہووݨا چاہیدے۔ انہاں آکھیا جو اقوامِ متحدہ کوں پیشگی انتباہی نظام، خاموش سفارت کاری، احتیاطی سفارتی اقدامات، سیکرٹری جنرل کوں ثالثی تے اقوامِ متحدہ دے منشور دے باب ششم دے تحت جھیڑیں دے پرامن حل دے طریقہ کار اچ مزید سرمایہ کاری کرݨی چاہیدی اے تاں جو اختلافات تصادم دی شکل اختیار نہ کرن۔ انہاں آکھیا جو پاکستان کیتے جھیڑیں دا پرامن حل ایندی خارجہ پالیسی دا بنیادی ستون تے اقوامِ متحدہ دے چارٹر دے تحت ہک سنجیدہ ذمہ واری اے۔انہاں آکھیا جو اڄوکے مشرقِ وسطیٰ دے بحران اچ پاکستان تحمل، کشیدگی اچ کمی تے سفارت کاری دی طرف واپسی دی حمایت کیتی۔ انہاں آکھیا جو ایران دے ہک دوست ہمسایہ ملک، خلیجی ممالک دے بھرا شراکت دار تے امریکہ دے نال پراݨے دوستانہ تعلقات رکھݨ آلے ملک دی حیثیت نال پاکستان علاقائی تے عالمی امن و استحکام کیتے ہک پائیدار حل دی سہولت کاری دی مخلصانہ کوششاں جاری رکھیندا پئے۔ پاکستانی مندوب آکھیا جو جھیڑے اکثر تاخیر نال کیتی ڳئی سفارت کاری، روکیے ڳئے مکالمے تے نظر انداز کیتے ڳئے اختلافات دا نتیجہ ہوندن۔ انہاں زور ݙتا جو اقوامِ متحدہ دی پہلی ذمہ واری صرف جھیڑے دے پُھٹ پاوݨ دے بعد ردِ عمل ݙیوݨ کائنی بلکہ انھاں کوں ایندے توں پہلے روکݨا اے جو او جاناں، خطیں تے نسلاں کوں اپݨی لپیٹ اچ گھن گھنن۔ پاکستانی مندوب آکھیا جو ثالثی کوں صرف بحران مکاوݨ دے انتظام دا ذریعہ کائنی بلکہ جھیڑے روکݨ دا بنیادی اصول بݨایا ونڄݨا چاہیدے تے اے بین الاقوامی قانون تے اقوامِ متحدہ دے منشور تے مبنی ہووݨی چاہیدی اے۔