مسئلہ کشمیر جنوبی ایشیا اچ امن و استحکام کیتے اہم تے پراݨا مسئلہ اے،عالمی برادری کردار نبھاوے۔ مشعال حسین ملک

اسلام آباد۔ 2 جون (اے پی پی) حریت رہنما یاسین ملک دی ذال مشعال حسین ملک آکھیے مسئلہ کشمیر جنوبی ایشیا اچ امن و استحکام دے سانڳے ہک اہم تے پراݨا مسئلہ اے جیندے حل کیتے عالمی برادری کوں اپݨا کردار نبھاوݨا چاہیدے۔ برٹش ہومز اچ منعقدہ عوامی اجتماع توں خطاب کریندے انہاں آکھیا جو کشمیری عوام اپݨے حقِ خودارادیت کیتے وݙے عرصے توں جدوجہد کریندے پئن تے ایں جدوجہد اچ کشمیریاں دے نال اظہارِ یکجہتی جاری رکھیا ویسے۔ مشعال حسین ملک اپݨے خطاب اچ اپݨے شوہر یاسین ملک دا ذکر کریندے آکھیا جو او کشمیری عوام دے حقوق کیتے آواز چاوݨ تے قید اچ ہن۔ انہاں ݙسایا جو ’’یاسین ملک بچاؤ آگاہی مہم‘‘ دا آغاز کیتا ڳئے تاں جو انھاں دے مقدمے تے حالات دے حوالے نال آگاہی پیدا کیتی ونڄ سڳے۔ انہاں آکھیا جو پاکستان تے کشمیر دے عوام وچال تاریخی، ثقافتی تے سماجی رابطے موجود ہن تے کشمیری عوام دی حمایت جاری رکھی ویسے۔ انہاں ایں عزم دا اظہار کیتا جو مقبوضہ کشمیر دے عوام دے نال یکجہتی برقرار رکھی ویسے۔ مشعال حسین ملک قومی اتحاد و یکجہتی دی لوڑھ تے زور ݙیندے آکھیا جو ملک کوں درپیش چیلنجز دا مقابلہ کرݨ کیتے سارے طبقات کوں رل تے کم کرݨا ہوسی۔ اجتماع اچ شرکاء کشمیر دے عوام دے نال یکجہتی دا اظہار کیتا تے مسئلہ کشمیر دے پرامن تے منصفانہ حل دی لوڑھ تے زور ݙتا۔