پاکستان تے اٹلی وچال سفارتی پاسپورٹس تے ویزا دی شرط ختم کرݨ دا معاہدہ

روم۔ 2 جون (اے پی پی) پاکستان تے اٹلی وچال سفارتی پاسپورٹس تے ویزا ختم کرݨ دا معاہدہ تھئے۔ اٹلی اچ پاکستان دے سفیر علی جاوید تے اٹلی دی وزارتِ خارجہ دے سیکرٹری جنرل سفیر ریکارڈو گواریگلیا ہݨے ہی سفارتی پاسپورٹس تے ویزا دی شرط ختم کرݨ دے معاہدے تے دستخط کیتے۔ وزارتِ خارجہ توں جاری بیان موجب اے باوقار دستخطی تقریب اتھاں اٹلی دی وزارتِ خارجہ اچ منعقد تھئی۔ تقریب توں پہلے ݙوہیں معزز شخصیات وچال ون آن ون ملاقات وی تھئی۔ فریقین ݙوطرفہ سٹریٹجک تعاون دی وسعت، رفتار تے مثبت پیش رفت تے اطمینان دا اظہار کریندے روایتی دوستانہ تے تعمیری تعلقات، نیز اقوامِ متحدہ تے یورپی یونین سودھے کثیرالجہتی فورمز تے تعاون دے مختلف پہلوواں دا جائزہ ڳھدا۔ ݙوہیں پاسوں ایں معاہدے کوں سانجھے اعتماد تے دوستی دا مظہر قرار ݙتا ڳیا تے آکھیا ڳیا جو اے ݙوہیں ملکاں وچال موجود وسیع ݙوطرفہ تعاون تے تبادلیں دے نظام اچ ہک اہم اضافہ اے۔ ایں معاہدے نال سفارتی وفد دے تبادلیں اچ سوکھ تھیسی تے ݙو پاسے رابطے مزید تکڑے تھیسن۔ݙوہیں ملکاں وچال ایں ویلھے ٻہوں سارے معاہدیں تے وی غور جاری اے جݙاں جو جامعہ توں تھنک ٹینکس وچال 21 مفاہمتی یادداشتاں (ایم او یوز) موجود ہن تے ݙوہیں حکومتاں وچال سیاحت، ثقافت، سائنس و ٹیکنالوجی، کھیݙ، اعلیٰ دفاعی تعلیم تے منشیات دی سمگلنگ دے خلاف تعاون سودھے مختلف شعبیں اچ 15 معاہدے طے پا چکن۔ دفاعی تعاون دا معاہدہ 2009ء اچ، وزرائے خارجہ وچال ’’سٹریٹجک انگیجمنٹ پلان‘‘ 2013ء اچ جݙاں جو ’’مشترکہ اقتصادی کمیشن‘‘ 2005ء اچ قائم کیتا ڳیا۔ سرمایہ کاری دے تحفظ دا معاہدہ 1997ء اچ، ݙوڑی شہریت دا معاہدہ 1983ء اچ تے حوالگیِ مجرمان دا معاہدہ 1972ء اچ طے پاتا ہئی۔ ایں توں پہلے 7 مئی 2025ء کوں پاکستان تے اٹلی اسلام آباد اچ ’’لیبر موبیلیٹی اینڈ مائیگریشن‘‘ دے حوالے نال مفاہمتی یادداشت تے دستخط کیتے ہن جیڑھا جو کہیں یورپی ملک دے نال پاکستان دا پہلا لیبر معاہدہ اے۔ ایندے تحت پاکستانی افرادی قوت کوں اٹلی اچ پاکستانیاں کیتے مختص 10,500 ملازمتاں دے کوٹے تئیں رسائی حاصل تھیسی۔ پاکستانی سفیر سیکرٹری جنرل کوں دفترِ خارجہ دے سیکرٹری دی طرفوں ستویں دور دے ݙوطرفہ سیاسی مشاورتی اجلاس اچ شرکت کیتے پاکستان آوݨ دی دعوت وی ݙتی۔ انہاں 2026ء دی چھیکڑی سہ ماہی اچ ایں اجلاس دے انعقاد دی تیاری تے اسلام آباد اچ اٹلی دے نویں تعمیر شدہ سفارت خانے جیڑھا جو ٻاہرلے ملک اٹلی دا ساریں توں وݙا سفارتی مشن ہوسی، دے افتتاح اچ دلچسپی دا اظہار کیتا جیڑھا پاکستان دے نال تعلقات دی اہمیت کوں ظاہر کریندے۔