وزیرِ مملکت صحت ڈاکٹرمختار بھرتھ گلوبل مینٹل ہیلتھ سمر انسٹیٹیوٹ اچ شرکت سانڳے امریکہ پڄ ڳئن

اسلام آباد۔ 3 جون (اے پی پی) وزیرِ مملکت صحت ڈاکٹر مختار بھرتھ گلوبل مینٹل ہیلتھ سمر انسٹیٹیوٹ اچ شرکت کیتے امریکہ پڄ ڳئن، جتھاں انھاں واشنگٹن ڈی سی اچ واقع چلڈرن نیشنل ہسپتال دا دورہ کیتا۔ ایں موقع تے ہسپتال دے سینئر حکام انھاں دا استقبال کیتا۔ دورے دے دوران ڈاکٹر مختار بھرتھ ہسپتال دے کمانڈ سینٹر تے شیخ زید انسٹیٹیوٹ آف پیڈیاٹریک سرجیکل انوویشن دا وی دورہ کیتا۔ انھاں دے رلے گلوبل انسٹیٹیوٹ آف ہیومن ڈویلپمنٹ دے بانی ڈائریکٹر ڈاکٹر عثمان ہمدانی وی موجود ہن۔ وزیرِ مملکت کوں ٻالاں دے علاج دے جدید طریقیں، ڈیجیٹل ہیلتھ سسٹمز، ٹیلی میڈیسن تے جدید ٹیکنالوجی دے ذریعے مریضاں کوں ݙتیاں ونڄݨ آلیاں سہولتاں تے تفصیلی بریفنگ ݙتی ڳئی۔دورے دے موقع تے ٻالاں تے نینگراں ذہنی صحت دے شعبے اچ تعاون دے ودھارے دے حوالے نال ہک خصوصی اجلاس وی منعقد تھیا، جیندے اچ ابتدائی تشخیص، مربوط علاج، سکول سطح تے ذہنی صحت دے پروگرامز تے کمیونٹی بیسڈ سروسز تے تفصیلی ڳالھ مہاڑ کیتی ڳئی۔ ڈاکٹر مختار بھرتھ آکھیا جو پاکستان تے امریکہ وچال ٻالاں تے نینگراں دی ذہنی صحت، تحقیق تے ٹیلی مینٹل ہیلتھ دے شعبیں اچ تعاون کوں مزید وسعت ݙیوݨ تے اتفاق تھئے۔ انھاں آکھیا جو ذہنی صحت دے نظام کوں مضبوط بݨاوݨ کیتے تربیتی پروگرامز تے استعداد کار اچ ودھارے دے اقدامات وی ناگزیر ہن۔ انھاں آکھیا ٻالاں دی ذہنی صحت اچ سرمایہ کاری ملک دے سماجی تے معاشی مستقبل کیتے نہایت اہم اے، جݙاں جو پاکستان اچ ذہنی صحت دے نظام کوں مستحکم بݨاوݨ کیتے نیشنل مینٹل ہیلتھ پالیسی متعارف کروائی ویندی پئی اے