اوکھے معاشی حالات اچ حکومت دا ساتھ ݙیوݨ تے کاروباری برادری دا شکریہ، حکومت تے نجی شعبے دی مضبوط شراکت داری معاشی ترقی دی ضمانت اے، وزیراعظم

اسلام آباد۔ 3 جون (اے پی پی) وزیراعظم محمد شہباز شریف اوکھے معاشی حالات اچ حکومت دا ساتھ ݙیوݨ تے کاروباری برادری دا شکریہ ادا کریندے آکھیے جو حکومت تے نجی شعبے دی مضبوط شراکت داری معاشی ترقی دی ضمانت اے، غیر رسمی معیشت کوں ٹیکس نیٹ اچ گھن آوݨ کیتے اقدامات کیتے ویندے پئن، کاروبار دوست پالیسیاں دی بدولت ملکی معیشت مستحکم تھئی اے تے ٻاہرلے سرمایہ کاراں دا اعتماد بحال تھئے۔ اے ڳالھ انہاں ملک دے معروف صنعتکاراں تے ممتاز کاروباری شخصیات دے وفد نال کوں آکھی جنہاں اتھاں انہاں دے نال ملاقات کیتی ۔ وزیراعظم دفتر دے میڈیا ونگ توں جاری بیان موجب اے ملاقات ملک دی مجموعی معاشی ترقی دی رفتار تکھی کرݨ تے مالی سال 27-2026 دے بجٹ دے حوالے نال کاروباری برادری توں مشاورت دے تناظر اچ ہئی۔ وفد اچ میاں محمد منشا، عارف حبیب، عاطف باجوہ، محمد علی تبہ، مصدق ذوالقرنین، زیاد بش، شہزاد سلیم، زیلاف منیر، عمر سعید، عمر منشا، یوسف سعید، کامران ارشد، خرم مختار، آصف پیر، سلطان گوہر اعجاز، فواد انور، ذوالفقار حیات، جاوید اقبال، یوسف حسین، عامر ابراہیم، خواجہ مسعود اختر تے اعجاز نبی شامل ہن۔وزیراعظم وفد دا خیرمقدم کریندے آکھیا جو تساں پاکستان دے سفیر تے دنیا اچ اساݙی سنڄاݨ او انہاں اوکھے معاشی حالات اچ حکومت دا ساتھ ݙیوݨ تے کاروباری برادری دا شکریہ ادا کریندے آکھیا جو حکومت تے نجی شعبے دی مضبوط شراکت داری معاشی ترقی دی ضمانت اے، پاکستان دی معیشت دے حوالے نال پالیسی سازی اچ کاروباری برادری نال مشاورت اہمیت رکھیندی اے ۔ انھاں آکھیا جو برآمدات تے مبنی ترقی دے رستے تے گامزن ہیسے، ایہا اساݙی معاشی پالیسی دا محور اے، غیر رسمی معیشت کوں ٹیکس نیٹ اچ گھن آوݨ کیتے اقدامات کیتے ویندے پئن، بجٹ اچ عوام کوں ریلیف ݙیوݨ کیتے اقدامات شامل کیتے ویندے پئن، کاروبار دوست پالیسیاں پاروں ملکی معیشت مستحکم تھئی تے ٻاہرلے سرمایہ کاراں دا اعتماد بحال تھئے۔ انھاں آکھیا جو حکومت ایجھی صنعتاں دے ودھارے کیتے کوشاں اے جِنھاں توں ملکی پیداوار ودھے، برآمدات اچ ودھارا ، ملازمتاں دے ودھ تون ودھ موقع پیدا تھئن ، صنعت، زراعت، انفارمیشن ٹیکنالوجی دے شعبیں اچ ترقی نال معیشت کوں مزید استحکام ملسی تے روزگار دے نویں موقع پیدا تھیسن، نوجواناں کیتے تکنیکی و فنی تربیت دے پروگرام شروع کیتن تاں جو انھاں کوں روزگار ملݨ اچ سوکھ ہووے تے او قومی ترقی اچ بھرپور کردار ادا کر سڳن۔وفد کوں کاروبار، صنعت و تجارت دے ودھارے دے حوالے نال حکومتی اقدامات تے بریفنگ ݙتی ڳئی جیندے اچ ݙسایا ڳیا جو ٹیکس مقدمات وقتی نمٹاوݨ کیتے ٹیکس ٹریبونلز اچ اصلاحات کیتیاں ڳئن، اِنھاں ٹریبونلز اچ انتہائی شفاف طریقہ کار دے ذریعے بھرتیاں کیتیاں ڳن، سپیشل کمرشل کورٹس دے قیام دے حوالے نال کمیٹی تشکیل ݙتی ڳئی اے، کراچی دی بندرگاہواں توں اندرلےِ ملک رسائی بہتر بݨاوݨ کیتے موٹروے ایم-10 دی اپ گریڈیشن تے پیپری فریٹ کوریڈور تے کم جاری اے، موٹروے ایم-13 (کھاریاں-راولپنڈی) دی تعمیر نال لاہور تے اسلام آباد وچال فاصلہ گھٹ تھی ویسے، پاکستان ریلوے دی ایم۔ایل ون تے ایم ایل-ٹو دی اپ گریڈیشن نال ریلوے دا انفراسٹرکچر بہتر تھیسی جیندے نال تجارتی سامان دی ترسیل بہتر ہوسی۔ بریفنگ موجب نیشنل اے آئی ٹرانسفارمیشن پلان تشکیل ݙتا ویندا پئے، شوگر تے سیمنٹ سیکٹر دی پیداوار دے حوالے نال اِنھاں صنعتاں اچ ویڈیو اینالیٹیکس دی تنصیب نال ریونیو دی مد اچ بہتری آئی۔ وفد خطے اچ امن دی بحالی کیتے پاکستان دی سفارتی کوششاں تے وزیراعظم تے انھاں دی ٹیم کوں بھرپور خراجِ تحسین پیش کیتا۔ کاروباری رہنماؤاں وزیراعظم دی قیادت اچ معاشی بحالی دے سفر تے بہتر مالیاتی انتظام تے اعتماد دا اظہار کیتا۔ وفد ملکی معیشت کوں درست سمت اچ گامزن کرݨ تے کاروبار و سرمایہ کاری کیتے موزوں ماحول ݙیوݨ تے وزیراعظم تے انھاں دی ٹیم دا شکریہ ادا کیتا۔ وفد دے ارکان ڈیجیٹل ادائیگیاں تے دستاویزی معیشت دے ودھارے دے حکومتی وژن دی تعریف کریندے ٹیکس اصلاحات تے کاروباری آسانیاں دے ودھارے دے اقدامات دا خیرمقدم کیتا۔ کاروباری رہنماواں صنعتاں کیتے بجلی دے نرخاں اچ کمی گھن آوݨ، ایکسپورٹ ڈویلپمنٹ لیوی دے خاتمے تے ٹیکس ریفنڈ دی وقتی ادائیگیاں تے وزیراعظم توں اظہارِ تشکر کیتا تے آندے بجٹ دی تیاری اچ کاروباری برادری کوں اعتماد اچ گھنݨ دے اقدام دی تعریف کیتی۔ انھاں وزیراعظم کوں قومی معیشت دی مضبوطی تے بجٹ دے حوالے نال اپݨی تجویزاں پیش کیتیاں۔ کاروباری برادری معاشی بحالی تے ترقی کیتے حکومت دے نال مکمل تعاون جاری رکھݨ دے عزم دا اظہار کیتا۔ وفد دے شرکاء صنعتی ترقی، برآمدات اچ ودھارے تے روزگار دے نویں موقع پیدا کرݨ دے حکومتی عزم دی تعریف کیتی ایں اجلاس اچ وفاقی وزیر قومی غذائی تحفظ و تحقیق رانا تنویر حسین، وفاقی وزیر قانون و انصاف اعظم نذیر تارڑ، وفاقی وزیر موسمیاتی تبدیلی مصدق ملک، وفاقی وزیر اقتصادی امور احد خان چیمہ، وفاقی وزیراطلاعات و نشریات عطاء اللہ تارڑ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیرِ پٹرولیم علی پرویز ملک، وفاقی وزیر پاور ڈویژن سردار اویس احمد لغاری، وزیرِ مملکت خزانہ بلال اظہر کیانی، معاونِ خصوصی صنعت و پیداوار ہارون اختر خان، اٹارنی جنرل منصور اعوان، گورنر سٹیٹ بینک جمیل احمد تے متعلقہ اعلیٰ سرکاری افسراں شرکت کیتی