سپیکر قومی اسمبلی دی قیادت اچ قومی اسمبلی سیکرٹریٹ رائٹ سائزنگ، مالی نظم و ضبط تے ادارہ جاتی جدت تے مشتمل ہک جامع اصلاحاتی پروگرام کامیابی نال نافذ کیتا

اسلام آباد۔ 3 جون (اے پی پی) سپیکر قومی اسمبلی سردار ایاز صادق دی قیادت اچ قومی اسمبلی سیکرٹریٹ رائٹ سائزنگ، مالی نظم و ضبط تے ادارہ جاتی جدت تے مشتمل ہک جامع اصلاحاتی پروگرام کامیابی نال نافذ کیتے۔ ایں پروگرام دا مقصد کارکردگی بہتر بݨاوݨ، شفافیت ودھاوݨ تے عوامی وسائل دا مؤثر استعمال یقینی بݨاوݨ اے۔ اِنھاں کفایت شعاری اقدامات دے نتیجے اچ سیکرٹریٹ موجودہ مالی سال اچ تقریباً 4.5 ارب روپے دی بچت حاصل کرݨ دی طرف ودھدا پئے، جیڑھا مجموعی بجٹ دا 27.3 فیصد بݨدے۔ قومی اسمبلی سیکرٹریٹ موجب مالی سال 2025-26ء کیتے قومی اسمبلی سیکرٹریٹ دا مجموعی بجٹ 16.3 ارب روپے ہئی۔ ایندے اچ 9.4 ارب روپے ملازمین متعلق اخراجات شامل ہن، جِنھاں اچ تنخواہیں، الاؤنسز تے قومی اسمبلی دے ارکان و سیکرٹریٹ افسراں دیاں ادائیگیاں شامل ہن، جݙاں جو 6.9 ارب روپے غیر ملازمت اخراجات ہن، جِنھاں اچ آپریشنل اخراجات، یوٹیلٹیز، ݙیکھ بھال، خریداری، ٹرانسپورٹ تے ٻئے انتظامی اخراجات شامل ہن۔ مختلف کفایت شعاری تے کارکردگی بہتر بݨاوݨ آلے اقدامات دے ذریعے سیکرٹریٹ ملازمین متعلق اخراجات اچ تقریباً 2.0 ارب روپے تے غیر ملازمت اخراجات اچ 2.5 ارب روپے دی بچت حاصل کیتی اے۔رائٹ سائزنگ اقدامات دے تحت قومی اسمبلی سیکرٹریٹ دی منظور شدہ اسامیاں دی تعداد 1,725 توں گھٹ کرتے 1,344 کیتی ویندی پئی اے۔ ایویں مجموعی طور تے 381 اسامیاں اچ کمی کیتی ویندی پئی اے جِنھاں اچوں 301 اسامیاں پہلے ہی ختم کیتیاں ڳئن جݙاں جوباقی 80 اسامیاں مالی سال 2026-27ء دے دوران ختم کیتیاں ویسن۔ اے اصلاحات سپیکر سردار ایاز صادق دے ایں عزم دی عکاسی کریندن جو ادارے کوں زیادہ مؤثر، کارکردگی تے مبنی تے گھٹ خرچ بݨایا ونڄے تاں جو قومی خزانے تے ٻوجھ گھٹ تھیوے۔ تاں جو اے واضح کیتا ویندے جو ایں عمل اچ کہیں وی ملازم کوں نہ برطرف کیتا ڳئے تے نہ ہی کہیں کوں مجبوراً استعفیٰ ݙیوݨا پئے، جیڑھا بہتر تے جدید انسانی وسائل دے انتظام دی مثال اے۔ غیر ملازمت اخراجات اچ نمایاں کمی سخت مالی نگرانی، کفایتی خریداری، توانائی دے مؤثر استعمال، آپریشنل اخراجات تے سخت کنٹرول تے جدید انتظامی نظام پاروں ممکن تھئی اے۔سپیکر دے وژن موجب پیپر لیس پارلیمنٹ دے نفاذ اِنھاں بچتاں اچ اہم کردار ادا کیتے۔ پارلیمانی امور دی مکمل ڈیجیٹلائزیشن دے ذریعے ایجنڈا، ٻلز، رپورٹا، پارلیمانی دستاویزات تے کمیٹی ریکارڈز دی الیکٹرانک ترسیل شروع کیتی ڳئی اے جیندے نال کاغذ دے استعمال، پرنٹنگ خرچے، ریکارڈ مینجمنٹ تے انتظامی تاخیر اچ واضح کمی آئی اے۔ ایں ڈیجیٹل نظام نہ صرف کارکردگی بہتر بݨائی اے بلکہ ماحولیاتی تحفظ اچ وی مدد ݙتی اے۔ جدید کاری دے ایجنڈے دے تحت قومی اسمبلی کوں جدید ٹیکنالوجی تے ڈیجیٹل ٹولز دے انضمام دے ذریعے ملک دی پہلی مصنوعی ذہانت (اے آئی) نال منسلک پارلیمنٹ بݨا ݙتا ڳئے جیندا مقصد قانون سازی دی تحقیق، دستاویزات دے انتظام، معلومات تئیں رسائی تے انتظامی کارکردگی کوں بہتر بݨاوݨ اے۔ اے اقدامات پارلیمانی نظام کوں جدید خطوط تے استوار کرݨ، ادارہ جاتی صلاحیت ودھاوݨ تے ارکان و متعلقہ فریقین کیتے خدمات بہتر بݨاوݨ اچ مدد ݙیندے پئن۔ قومی اسمبلی سیکرٹریٹ سرکاری ٹرانسپورٹ تے سفری خرچیں اچ وی سخت کفایت شعاری اقدامات کیتن۔ سرکاری گاݙیاں دے ٻیڑے دے بہتر انتظام، گاݙیاں دے مؤثر استعمال، ایندھن دے استعمال اچ کمی تے ݙیکھ بھال خرچے تے سخت کنٹرول دے ذریعے نمایاں بچت حاصل تھئی اے۔سپیکر قومی اسمبلی سردار ایاز صادق ایں عزم دا اعادہ کیتے جو مالی نظم و ضبط، شفافیت، ڈیجیٹل تبدیلی، ادارہ جاتی جدید کاری تے ذمہ دار حکمرانی قومی اسمبلی دی اولین ترجیحات ہن۔ انھاں آکھیا جو اِنھاں اصلاحات دے ذریعے حاصل تھیوݨ آلی بچت ایں ڳالھ دا ثبوت اے جو پارلیمنٹ عوامی وسائل دے مؤثر استعمال تے ٻنہاں اداریں کیتے مثال قائم کرݨ کیتے پرعزم اے۔ قومی اسمبلی سیکرٹریٹ اصلاحات دا اے سلسلہ جاری رکھیسی تاںجو کارکردگی اچ مزید بہتری، جوابدہی دا ودھارا، جدت دا تسلسل تے قومی وسائل دا بہترین استعمال یقینی بݨایا ونڄ سڳے۔