مظفر ڳڑھ، آئل ٹینکر دی موٹر سائیکل سواراں کوں ٹکر، 3 سکیاں بھیݨیں جاں بحق، والد سودھے 3 بندے زخمی

مظفر ڳڑھ۔ 06 جون (اے پی پی) کوٹ ادو اچ ٹریفک حادثے اچ آئل ٹینکر دی موٹر سائیکل سواراں کوں ٹکر پاروں 3 سکیاں بھیݨیں جاں بحق، پیؤ سودھے 3 لوک زخمی تھی ڳئے۔ ریسکیو ذرائع موجب کوٹ ادو دے علاقے طارق چوک اچ ہک تکھی رفتار آئل ٹینکر غلط اوور ٹیک کریندے سامݨے توں آندے ݙو موٹر سائیکلاں کوں ٹکر مار ݙتی، حادثے دے نتیجے اچ اݙہ گرماݨی کوٹ ادو دی رہائشی 3 سکیاں بھیݨیں 12 سالاں وجیہہ، 16 سالاں حنیزہ تے 14 سالاں دی عدیلہ موقع تے ہی جاں بحق تھی ڳیاں، جݙاں ترائی بھیݨیں دے پیو 45 سالہ محمد خلیل، 17 سالہ محمد الطاف تے 15 سالہ سمیعہ شدید زخمی تھی ڳئے۔ریسکیو 1122 دیاں ٹیماں حادثے دی جاہ تے پڄ تے ترائی سکیاں بھیݨیں دیاں لاشان کوں ڈیڈ باڈی شیٹ نال کور کرݨ دے بعد ڈی ایچ کیو ہسپتال کوٹ ادو منتقل کر ݙتا، جݙاں جو جاں بحق تھیوݨ آلیاں چھوریں دے والد محمد خلیل تے 15 سالہ سمیعہ تے 17 سالہ محمد الطاف جیڑھے سڳے بھیݨ بھرا ہن کوں وی ابتدائی طبی امداد ݙے تے ڈی ایچ کیو ہسپتال کوٹ ادو منتقل کر ݙتا ڳئے۔ عینی شاہدین موجب حادثہ آئل ٹینکر دی تکھی رفتاری تے غلط اوور ٹیکنگ پاروں پیش آئے، تھاݨہ سٹی پولیس کوٹ ادو آئل ٹینکر کوں تحویل اچ گھن تے ضابطے دی کارروائی شروع کرݙتی اے، ایں اندوہناک حادثے پاروں علاقے اچ ݙکھ دی فضا اے