پاکستان معاشی استحکام دے بعد ترقی دے نویں مرحلے اچ داخل تھیندا پئے، شرحِ نمو چار سال دی بلند ترین سطح تے پڄ ڳئی، وزیرِ خزانہ محمد اورنگزیب

اسلام آباد۔ 11 جون (اے پی پی) وفاقی وزیرِ خزانہ سینیٹر محمد اورنگزیب آکھیے جو پاکستان گزریل کڄھ سالاں اچ درپیش غیر معمولی معاشی چیلنجز دے باوجود معاشی استحکام حاصل کر گھدے اتے ہݨ ملک ترقی دے نویں مرحلے اچ داخل تھیوݨ دی بنیاد رکھ ݙتی اے۔ قومی اقتصادی سروے 2025-26 پیش کریندیں ہوئیں وزیرِ خزانہ آکھیے جو حکومت دی مؤثر معاشی پالیسیاں، مالی نظم و ضبط، اصلاحاتی اقدامات تے سرمایہ کاراں دے ودھدے ہوئے اعتماد دے باعث قومی معیشت نمایاں کارکردگی دا مظاہرہ کیتا۔ انھاں ݙسائے جو مالی سال 2025-26 اچ ملکی شرحِ نمو 3.7 فیصد رہی، جیڑھی جو گزشتہ چار سالاں دی بلند ترین سطح اے۔ انھاں آکھیے جو مالی سال دے آغاز اچ عالمی تجارتی غیر یقینی صورتحال، شدید مون سون بارشاں تے خطے اچ ودھدی ہوئی کشیدگی سویں چیلنجز موجود ہن، تاہم حکومتی پالیسیاں تے معاشی نظم و ضبط دے باعث معیشت مستحکم رہی اتے سرمایہ کاراں دا اعتماد بحال تھیا۔ محمد اورنگزیب دے مطابق پاکستان دی معیشت دا حجم ودھ تے 452.1 ارب ڈالر (126.9 کھرب روپے) تئیں پڄ ڳئے، جڈانجو فی کس آمدنی 1,751 ڈالر توں ودھ تے 1,901 ڈالر تھی ڳئی اے۔ انھاں آکھیے جو جے مشرقِ وسطیٰ اچ کشیدگی تے ٻئے بیرونی عوامل اثر انداز نہ ہوندے تاں شرحِ نمو 4 فیصد توں وی ودھ تھی سڳدی ہئی۔ وزیرِ خزانہ ݙسائے جو زرعی شعبے اچ مجموعی نمو 2.8 فیصد رہی جڈانجو فصلاں دے شعبے اچ 1.4 فیصد مثبت نمو ریکارڈ کیتی ڳئی۔ انھاں دے مطابق لائیو سٹاک زرعی معیشت دا سبھ توں اہم شعبہ اے تے زرعی جی ڈی پی اچ ایں دا حصہ تقریباً 63 فیصد اے۔ صنعتی شعبے دے حوالے نال انھاں آکھیے جو وݙیاں صنعتاں (ایل ایس ایم) 6 فیصد نمو حاصل کیتی، جیڑھی جو گزشتہ چار سالاں اچ سبھ توں ودھ اے۔ انھاں آکھیے جو معاشی بحالی دے ثمرات معیشت دے مختلف شعبیاں اچ نمایاں طور تے نظر آندے پئن اتے اے بحالی وسیع بنیاداں تے استوار اے۔ وفاقی وزیرِ خزانہ ایں عزم دا اظہار کیتا جو حکومت معاشی استحکام کوں پائیدار ترقی اچ تبدیل کرݨ، سرمایہ کاری ودھاوݨ، برآمدات دے فروغ تے عوامی خوشحالی کیتے اصلاحات دا سلسلہ جاری رکھیسی۔