لیونل میسی دی تاریخی ہیٹ ٹرک، فیفا ورلڈ کپ گولز دا ریکارڈ برابر،

نیویارک۔17 جون(اے پی پی)دفاعی چیمپئن ارجنٹائن دے کپتان لیونل میسی فیفا ورلڈ کپ 2026 اچ تاریخ رقم کریندے ہوئیں جرمنی دے میروسلاو کلوزے دے 16 ورلڈ کپ گولز دا ریکارڈ برابر کر ݙتا۔ لیونل میسی دی شاندار ہیٹ ٹرک نال ارجنٹائن اپݨے افتتاحی میچ اچ الجیریا کوں 0-3 توں ہرا ݙتے۔ کینساس سٹی اچ کھیݙے ڳئے مقابلے اچ میسی پہلے ہاف اچ خوبصورت گول کر تے دفاعی چیمپئن ارجنٹائن کوں وتھی ݙیوائی، ڄݙاں جو ݙوجھے ہاف اچ ٻئے 2 گول کر تے اپݨے کیریئر دی پہلی ورلڈ کپ ہیٹ ٹرک مکمل کیتی۔ 38 سالہ لیونل میسی ورلڈ کپ دی تاریخ اچ ہیٹ ٹرک کرݨ والے سب توں وݙی عمر دے کھلاڑی وی ٻݨ ڳئن۔ اے انھاں دے بین الاقوامی کیریئر دی 11ویں ہیٹ ٹرک اے، ڄݙاں جو ورلڈ کپ اچ انھاں دے مجموعی گولز دی تعداد 16 تھی ڳئی اے۔ میچ اچ شرکت دے نال ہی لیونل میسی 6 ورلڈ کپ کھیݙݨ والے دنیا دے پہلے فٹبالر وی ٻݨ ڳئن۔ اے ارجنٹائن کیتے انھاں دا 200واں بین الاقوامی میچ ہا۔ دفاعی چیمپئن ارجنٹائن دی اے کامیابی ورلڈ کپ اچ میسی دی 17ویں فتح وی ثابت تھئی، جیںدے بعد او ایں اعزاز اچ وی کلوزے دے برابر آ ڳئن۔