ایشیائی ترقیاتی بینک پاکستان کیتے 70 کروڑ ڈالر قرض دی منظوری ݙے ݙتی

اسلام آباد۔18 جون(اے پی پی)ایشیائی ترقیاتی بینک (اے ڈی بی) پاکستان کیتے 70 کروڑ ڈالر قرض دی منظوری ݙے ݙتی اے جیںدا مقصد انشورنس شعبے اچ اصلاحات، کوریج ودھاوݨ اتے مالیاتی تحفظ دے نظام کوں مضبوط ںݨاوݨ اے۔ ایشیائی ترقیاتی بینک دے مطابق ایں پروگرام دا مقصد کساناں، خواتین اتے گھٹ آمدݨ والے خانداناں کوں بہتر مالی تحفظ ݙیوݨ اے۔ پاکستان اچ انشورنس دا حجم ایں ویلھے مجموعی قومی پیداوار (جی ڈی پی) دے صرف 0.7 فیصد دے برابر اے ڄݙاں جو نویاں اصلاحات نال قدرتی آفات اتے معاشی جھٹکیاں نال نمٹݨ دی صلاحیت اچ بہتری آسی اتے انشورنس مارکیٹ کوں جدید، شفاف اتے مسابقتی نظام اچ تبدیل کیتا ویسی۔ اے ڈی بی ڈیجیٹل نظام دے ذریعے انشورنس خدمات ودھاوݨ تے زور ݙیندے سیٹلائٹ ٹیکنالوجی اتے جدید انشورنس ماڈلز متعارف کرواوݨ دا فیصلہ کیتے۔ تریمتیں اتے ٻالڑیاں دی لوڑھ کوں ݙیہدے ہوئے خصوصی انشورنس مصنوعات وی متعارف کرائیاں ویسن۔ بینک دے مطابق موثر انشورنس نظام قدرتی آفات دے بعد حکومتی مالی بوجھ اچ کمی گھن آوݨ اچ مددگار ثابت تھیسی ڄݙاں جو ایں پروگرام توں نجی شعبے دی سرمایہ کاری اتے مجموعی معاشی ترقی کوں وی فروغ مِلسی۔ طویل مدتی بچتاں کوں انفراسٹرکچر اتے بانڈ مارکیٹ اچ استعمال کرݨ دے نال نال نجی پنشن سکیماں اتے سالانہ پنشن نظام دے ودھارے کیتے وی اقدامات کیتے ویسن۔ ایشیائی ترقیاتی بینک دا آکھݨ اے جو ہک مضبوط اتے جدید انشورنس نظام پاکستان دی مالی پائیداری، معاشی استحکام اتے سماجی تحفظ دے ڈھانچے کوں ٻیا مضبوط ٻݨاوݨ اچ اہم کردار ادا کریسی۔