قاہرہ اجلاس دا اعلامیہ جاری: پاکستان، مصر، سعودیہ اتے ترکیہ دا ایران امریکا مفاہمت دا خیرمقدم

قاہرہ۔ 21 جون (اے پی پی)مصر اچ پاکستان، سعودی عرب اتے ترکیہ دے وزرائے خارجہ دے چوتھے مشاورتی اجلاس دا مشترکہ اعلامیہ جاری کر ݙتا ڳئے۔ اعلامیے دے مطابق چارے ملکاں دے وزرائے خارجہ علاقائی اتے بین الاقوامی پیش رفت تے تفصیلی ڳآلھ مہاڑ کیتی اے اتے مشرقِ وسطیٰ سودھا وسیع تر خطے اچ امن، سلامتی اتے استحکام دے ودھارے کیتے مسلسل مشاورت اتے باہمی ہم آہنگی کوں اہم قرار ݙتے۔ مصر دے صدر عبدالفتاح السیسی ولوں مشرقِ وسطیٰ کیتے پیش کیتے ڳئے وژن دی تعریف کریندے آکھیا ڳئے جو اے خطے اچ استحکام دے ودھارے دی نویں راہ ݙکھیندے۔ وزرائے خارجہ امریکا اتے ایران وچال اسلام آباد مفاہمتی یادداشت تے دستخط دا خیرمقدم کریندے ایکوں کشیدگی ڳھٹاوݨ اتے تنازعے مکاوݨ کیتے ہک مثبت پیش رفت قرار ݙتے۔ مشترکہ اعلامیے موجب ممکنہ تنازع علاقائی سلامتی، عالمی سپلائی چینز اتے بین الاقوامی تجارت کیتے سنگین خطرات دا باعث ٻݨ سڳدا ہا۔ وزرائے خارجہ مفاہمت کوں ممکن ٻݨاوݨ اچ علاقائی و بین الاقوامی فریقاں دیاں کاوشاں دی تعریف کیتی اتے متعلقہ فریقاں تے زور ݙتے جو او اپݨے وعدیاں تے مکمل اتے دیانتداری نال عملدرآمد کرن۔ چارے ملکاں دے وزرائے خارجہ ایں تاریخی پیش رفت اچ پاکستان دے کلیدی کردار کوں خراجِ تحسین پیش کیتا ڄݙاں جو مذاکرات کوں منطقی انجام تئیں پڄاوݨ اچ قطر دی معاونت دی وی تعریف کیتی۔ اعلامیے اچ مذاکرات دے اگلے مرحلے کوں تیکھے اتے کامیابی نال مکمل کرݨ اتے باقی رہ ڳئے مسائل دا پائیدار اتے سارے فریقاں کیتے قابلِ قبول حل ڳولݨ تے زور ݙتے۔ اجلاس اچ اے وی واضح آکھیا ڳیا جو خلیجی عرب ریاستاں اتے شام دے امن و استحکام سودھا خطے دے سارے ملکاں دے چنتے کوں ݙیہدے ہوئے اقدامات تھیوݨے چاہیدن، مسئلہِ فلسطین مشرقِ وسطیٰ اچ امن، سلامتی اتے استحکام کیتے اقدامات خروری ہین، فلسطینی کاز منصفانہ، جامع اتے دیرپا امن دیاں کوششاں دا مرکز اے۔ اجلاس اچ غزہ، مغربی کنارے اتے مقبوضہ مشرقی بیت المقدس دی انسانی اتے سیاسی صورتِ حال تے خصوصی توجہ ݙتی ڳئی اتے فلسطینی عوام دے حقوق دے تحفظ اتے خطے اچ پائیدار امن دی لوڑھ تے زور ݙتا ڳیا۔