مشرقِ وسطیٰ اچ قیامِ امن اولین ترجیح، پاکستان دے کردار کوں دنیا سراہے: جے ڈی وینس

برگن سٹاک۔21 جون(اے پی پی)امریکی نائب صدر جے ڈی وینس مشرقِ وسطیٰ اچ امن دے قیام کوں امریکا دی اولین ترجیح قرار ݙیندے ہوئیں آکھیے جو پاکستان دے مثبت کردار کوں پوری دنیا اچ سراہیا ڳئے۔ اپݨے خطاب اچ جے ڈی وینس آکھیا جو امریکا خطے اچ امن ودھاوݨ کیتے ایران توں وی مثبت کردار چاہندے اتے مستقبل کیتے بہترین فیصلے کرݨ چاہندے۔ انھاں وزیراعظم شہباز شریف اتے فیلڈ مارشل سید عاصم منیر دے کردار کوں لائقِ تحسین قرار ݙیندے آکھیا جو فیلڈ مارشل سید عاصم منیر ہک بہترین سپہ سالار ہین، جنھاں امن کوششاں اچ اہم کردار ادا کیتے۔ ایں موقع تے وزیراعظم شہباز شریف آکھیا جو موجودہ صورتِ حال عالمی امن کیتے ہک اہم موقع اے اتے سارے رہنما دنیا اچ امن اتے استحکام دے ودھارے کیتے اݨتھاں کٹھے تھئن۔ انہاں امید کیتی جو مشترکہ کوششاں نال دنیا اچ اتحاد، امن اتے استحکام ودھایا ونڄ سڳدے۔ ݙوجھے پاسے قطر دے وزیراعظم وی وزیراعظم شہباز شریف اتے فیلڈ مارشل سید عاصم منیر کوں خراجِ تحسین پیش کریندے آکھیا جو اے امن عمل صرف آغاز اے، خطے دے بہتر مستقبل کیتے مشترکہ کوششاں جاری ہین اتے اڄ دی اے پیش رفت نہ صرف مشرقِ وسطیٰ ٻھل پوری دنیا دے امن و سلامتی کیتے غیر معمولی اہمیت رکھیندی اے۔