سرائیکی اکیڈمی پاکستان ولوں مرثیہ گو شاعر مولوی محمد رمضان بہار ملتانی، دےو رھیݨے تے محفلِ مسالمہ دی مجلس

اسلام آباد۔21 جون(اے پی پی)سرائیکی اکیڈمی پاکستان ولوں نیشنل پریس کلب اسلام آباد اچ مرثیہ گو شاعر مولوی محمد رمضان بہار ملتانی، جنہاں کوں لکھنؤ دے اربابِ علم و دانش “انیسِ ملتان” دا خطاب ݙتا ہئی، دی 60 ویں برسی دے موقع تے محفلِ مسالمہ دی مجلس تھئی۔ جیں دی صدارت بہار ملتانی مرحوم دے فرزند ڈاکٹر غضنفر مہدی کیتی۔ محفل دے مہمانِ خاص صوفی شاعر وفاچشتی تے مہمانِ اعزاز نذیر تبسم ہن، جڈاں جو شاملِ محفل شعرائے کرام عالی مقام حضرت امام حسینؑ دی بارگاہ وچ کلماتِ عقیدت پیش کیتے۔ ممتاز دانشوراں تے سرائیکی اکیڈمی دی صدر ڈاکٹر سعدیہ کمال، کوکب اقبال، احسان کبریا، پروفیسر آفتاب حیات، سلطان محمود شاہین، وسیم مغل، نذیر تبسم، محمد اسماعیل، ڈاکٹر حسین احمد ہمدانی، علی حسین آرائیں، عبدالغفور ملاح، فرحان نواز ، ملیحہ آبادی تے ٻنہاں مقررین نے بہار ملتانی دی مرثیہ گوئی تے سیر حاصل گفتگو کریندیں ہوئیں فلسفۂ شہادت کوں نشابر کیتا۔ مقررین حضرت امام حسینؑ دے جذبۂ ایثار تے قربانی کوں خراجِ تحسین پیش کریندیں ہوئیں آکھیا جو دینِ اسلام دی سربلندی تےحق کوں پاوݨ سانگے آپؑ دے پورے خانوادے دی عظیم قربانی ہی دینِ اسلام دی بقاء اے۔ صدرِ مجلس ڈاکٹر غضنفر مہدی آپدے والد بہار ملتانی دی دینی خدمات تے اُنہاں دی مرثیہ گوئی کوں عزادارانِ حسینؑ واسطے ہک وݙا مذہبی سرمایہ قرار دتا۔ وقت دے مایہ ناز علمائے کرام، مشائخ عظام، ذاکرین تے مرثیہ خواناں بہار ملتانی دے کلام کوں آپدے خطاب دا حصہ بݨا تے پاکستان تے پاکستان توں باہر ٻہوں پذیرائی حاصل کیتی۔ اُنہاں آکھیا جو بہار ملتانی عمر بھر درِ بتولؑ توں ہی خیرات منگی ہئی تے اُنہاں دا ہی سایا ہݨ تئیں ساݙے سراں تے قائم اے۔ رضوان حیدر رضوی نے دعا کرائی۔ صدر پی ایف یو جے ورکرز تے سرائیکی ادبی اکیڈمی ڈاکٹر سعدیہ کمال شہداءِ کربلا دے حضور گلہائے عقیدت پیش کیتے تے حاضرین دا شکریہ ادا کیتا۔ سیکرٹری جنرل شاہد دھریجہ نظامت (سٹیج سیکرٹری) دے فرائض بخوبی انجام ڈتے۔