وزیرِ خزانہ محمد اورنگزیب قومی اسمبلی اچ آڈیٹر جنرل پاکستان دیاں آڈٹ رپورٹاں پیش کر ݙتن

اسلام آباد۔ 24 جون (اے پی پی)وفاقی وزیرِ خزانہ و محصولات سینیٹر محمد اورنگزیب قومی اسمبلی اچ حکومتِ پاکستان دے مالی سال 2024-25 دے تخصیصی حسابات تے آڈیٹر جنرل پاکستان دی وفاقی حسابات بارے آڈٹ سال 2025-26 دیاں آڈٹ رپورٹاں پیش کر ݙتن ڄیڑھیاں آئینِ اسلامی جمہوریہ پاکستان دے آرٹیکل 171 دے تحت قومی اسمبلی دے سرکاری کاروبار دے ہک لازمی حصے دے طور تے ایوان اچ پیش کیتاں ڳئن۔ اے پیش رفت پاکستان اچ عوامی مالیاتی نظم و نسق اتے احتسابی نظام کوں تکڑا ٻݨاوݨ کیتے ہک اہم قدم اے۔ پاکستان دی تاریخ اچ پہلی واری وفاق بارے آڈٹ رپورٹاں اوں ہی مالی سال پارلیمان اچ پیش کیتاں ڳئن جیندے اچ آڈٹ کیتا گئے۔ ایں پیش رفت نال نہ صرف آڈٹ رپورٹنگ دے نظام کوں ویلے سر ٻݨاوݨ دے عمل کوں فروغ ملیے، ٻھل عوامی اخراجات اتے پارلیمانی نگرانی کوں ٻیا اثر دار تے بامعنی ٻݨاوݨ اچ وی مدد ملسی۔ ایں موقع تے وزیرِ خزانہ آکھیا جو آڈٹ رپورٹاں دی ویلے سر پیشکش حکومت دے ایں عزم دا منڈھ اے جو عوامی مالیات دے انتظام اچ شفافیت، جوابدہی تے پارلیمانی نگرانی کوں ٻیا تگڑا بݨایا ونڃے۔ انہاں زور ݙتے جو آڈٹ مشاہدات اوں ویلے زیادہ اثر دار ثابت تھیندن جݙاں او ویلے سر پارلیمان اچ پیش کیتے ونڄن تاں جو ایں سانڳے اصلاحی اقدامات ویلے تے  کیتے ونڄ سڳن۔ انہاں آکھیا جو ایں سال ہک ٻئی اہم پیش رفت اے وی اے جو آڈٹ رپورٹاں پہلی واری قومی اسمبلی کوں ڈیجیٹل ذریعیاں نال ݙتیاں ونڄن جیندے نال معزز اراکینِ پارلیمان کوں رپورٹاں ہکو ویلے الیکٹرانک صورت اچ مل ڳئن۔ اے اقدام پارلیمانی امور اچ ڈیجیٹلائزیشن، کارکردگی اچ بہتری تے کاغذ توں پاک ماحول کیتے اہم اے، ایندے نال ڈیجیٹل فراہمی پاکستان اچ مالیاتی شفافیت، چنڳی حکمرانی، ادارہ جاتی جوابدہی تے عوامی وسائل تے پارلیمان دی نگرانی دے نظام کوں ٻیا مستحکم کرݨ اچ بہتری آسی۔