وزیراعلیٰ دی ہدایت تے محرم الحرام دے دوران ضلع مظفرڳڑھ اچ سکیورٹی دے بہترین انتظامات کیتے ڳئے

اسلام آباد۔ 26 جون (اے پی پی)وزیراعلیٰ پنجاب مریم نواز شریف دیاں ہدایات تے محرم الحرام دے دوران ضلع مظفر ڳڑھ وچ سکیورٹی تے انتظامی امور کیتے بہترین انتظامات کیتے ڳئے۔ ڈپٹی کمشنر عثمان طاہر جپہ تے ڈی پی او مظفر ڳڑھ سید غضنفر علی شاہ دی زیرِ نگرانی ضلع وچ مجالس تے جلوساں دے پرامن انعقاد کوں یقینی بݨایا ڳیا۔محرم الحرام دے دوران پولیس، ریسکیو 1122، محکمہ صحت، میپکو (واپڈا)، میونسپل کمیٹیاں تے ٻئے متعلقہ ادارے مکمل طور تے متحرک رہیے۔ سارے شعبیں اپݨے اپݨے فرائض ذمہ داری تے سوہݨے انداز وچ سرانجام ݙتے۔ سکیورٹی، صفائی، طبی سہولتاں، بجلی دی بلا تعطل فراہمی تے ہنگامی امدادی خدمات کوں یقینی بݨایا ڳیا۔مظفر ڳڑھ وچ وی 10 محرم الحرام ٻہوں عقیدت تے احترام نال منایا ڳئے، اڄ مظفر ڳڑھ وچ 113 جلوس کڈھئے ڳئن جنہاں وچوں 38 جلوساں کوں حساس قرار ݙتا ڳئے، جݙاں جو 131 مجالس برپا تھیندیاں پئن۔ انھاں دی سکیورٹی کیتے 1300 پولیس اہلکار ڈیوٹی دے فرائض سرانجام ݙتن۔ضلعی انتظامیہ موجب سارے اداریں دے سانجھے تعاون، اثر دار حکمتِ عملی تے مسلسل نگرانی پاروں ضلع بھر وچ محرم الحرام دے جلوس تے مجالس پرامن ماحول وچ اختتام پذیر تھیاں۔ عوام ضلعی انتظامیہ، پولیس تے ٻنہاں اداریں دی ویلھے سر تے چنڳی کارکردگی دی تعریف کیتی۔(ڈاکٹرسعدیہ کمال)