امریکہ تے ایران دے ہک ٻئے تے حملیاں دے بعد تیل دی قیمتاں اچ ہک واری ولا ودھارا

نیویارک۔29 جون (اے پی پی) اڄوکے ݙینہ اچ امریکہ تے ایران دے ہک ٻئے تے حملیاں دے بعد سنوار کوں تیل دی قیمتاں اچ ہک واری ولا اضافہ ݙیکھݨ اچ آئے ڄݙاں جو آبنائے ہرمز دے ذریعے توانائی دی ترسیل دی رفتار ولا سست تھی ڳئی اے۔ بی بی سی دے مطابق برینٹ دے مستقبل دے سودے 58 سینٹ یعنی 0.8 فیصد ودھارے دے نال 72.57 ڈالر فی بیرل تے ویسٹ ٹیکساس انٹرمیڈیٹ دے سودے 88 سینٹ یعنی 1.3 فیصد اضافے دے نال 70.11 ڈالر فی بیرل اچ طے تھئن۔ تجزیہ کاراں دا آکھݨ اے جو تیل دی مارکیٹ کوں ہݨ وی کافی خطرات دا سامݨا اے۔ انھاں آکھیا جو اے اطمینان حیران کن اے تے جے رسد دی بحالی سست رہی تاں ایں توں قیمتاں اچ نمایاں اضافے دا خطرہ واضح طور تے موجود اے۔ آبنائے ہرمز دے ذریعے خام تیل دی ترسیل اچ اضافے دے بعد گزرے ہوئے ہفتے برینٹ خام تیل دی قیمت اچ 10.6 فیصد ڳھٹکی تھئی ہئی، خام تیل دے نرخاں اچ ڳھٹکی دا اے رجحان مسلسل ہفتیاں توں جاری ہئی۔