قائدِ سرائیکی بیرسٹر تاج محمد خان لنگاہ دے مشن کوں ہر صورت پورا کیتا ویسے تے صوبہ سرائیکستان دے قیام کیتے عملی جدوجہد نال صوبہ حاصل کریسوں، پاکستان سرائیکی پارٹی دے سیکرٹری جنرل ملک جاوید حسین چنڑ ایڈووکیٹ

اسلام آباد۔ 30 جون (اے پی پی) پاکستان سرائیکی  پارٹی دے سیکرٹری جنرل ملک جاوید حسین چنڑ ایڈووکیٹ، سرائیکستان قومی اتحاد دے رہنما شریف خان لاشاری تے ڈاکٹر عباس کھوکھر ضلعی صدر پاکستان سرائیکی پارٹی لودھراں پارٹی کارکنان دے نال قائدِ سرائیکی عوام بیرسٹر تاج محمد خان لنگاہ دے مزار تے حاضری ݙتی اتے پارٹی پرچم دی چادر چڑھائی، تے بیرسٹر تاج محمد خان لنگاہ کوں خراجِ عقیدت پیش کیتا۔ایں موقع تے کارکنان ایں عزم دا اظہار کیتا جو قائدِ سرائیکی بیرسٹر تاج محمد خان لنگاہ دے مشن کوں ہر صورت پورا کیتا ویسے تے صوبہ سرائیکستان دے قیام کیتے عملی جدوجہد نال صوبہ حاصل کریسوں۔ اج اسمبلی اچ ہر پاسے سرائیکی وسیب دے منتخب نمائندے آپݨے وسیب کیتے تے وسیب دے بجٹ کیتے آواز بلند کریندے پئن، اے آواز بیرسٹر تاج محمد خان لنگاہ دی کوششاں دا نتیجہ اے۔ انھاں آکھیا جو قائدِ سرائیکی سرائیکی صوبے دا جیڑھا خواب ݙٹھا ہئی اج ایں دی تعبیر شروع تھی ڳئی اے، اے ایں ڳالھ دی گواہی اے جو سرائیکی وسیب دے ایم این ایز تے ایم پی ایز اسمبلیاں اچ صرف سرائیکستان صوبے دی ڳالھ کریندے پئن جیڑھی حق تے سچ دی فتح اے۔ سیکرٹری جنرل ملک جاوید چنڑ ایڈووکیٹ آکھیا جو بیرسٹر تاج محمد خان لنگاہ سرائیکی قوم دا جیڑھا مقدمہ لڑیا ہئی ایں دا فیصلہ تھیوݨ ویندا پئے، اساں وسیب دی الیکٹیبل کلاس کوں اپیل کریندوں جو او سرائیکی صوبے دی نمائندگی کریندے ہوئیں ہر فورم تے آواز بلند کرن تانجو سرائیکی عوام کوں آپݨا اختیار صوبہ سرائیکستان دے قیام دی صورت اچ مل سڳے۔