ڈیرہ غازی خان اچ آندے 48 گھنٹیاں اچ سیلاب آوݨ دا خدشہ، عوام کوں احتیاطی تدابیر اختیار کرݨ دی ہدایت

ڈیرہ غازی خان۔01 جولائی (اے پی پی) محکمہ موسمیات دے فلڈ فورکاسٹنگ ڈویژن تے پراونشل ڈیزاسٹر مینجمنٹ اتھارٹی (پی ڈی ایم اے) ولوں جاری کیتی ڳئی تازہ فلڈ فورکاسٹنگ رپورٹ دے مطابق آندے 48 گھنٹیاں اچ ڈیرہ غازی خان ڈویژن دے پہاڑی رودکوہی نالیاں اچ اچانک سیلاب آوݨ دا خدشہ ظاہر کیتا ڳئے۔ بدھ کوں جاری کیتی ڳئی رپورٹ دے مطابق مغربی ہواواں دے نویں سلسلے تے مون سون دی مرطوب ہواواں دے اثرات پاروں ڈیرہ غازی خان تے گردونواح اچ ڳاڄ کھمݨ نال بارش جڈانجو بعض مقامات تے موسلادھار بارش دا امکان اے۔ اِنھاں بارشاں دے نتیجے اچ پہاڑی ندی نالیاں اچ اچانک طغیانی پیدا تھی سڳدی اے، جئیں نال نشیبی علاقیاں تے رودکوہی بیلٹ اچ پاݨی داخل تھیوݨ دا خدشہ اے۔ پی ڈی ایم اے خبردار کیتے جو 2 توں 4 جولائی دے دوران ملک دے مختلف دریاواں تے نہراں اچ پاݨی دی آمد اچ اضافے دا امکان اے۔ ایں دوران ڈیرہ غازی خان ڈویژن دے رودکوہی نالیاں، دریائے کابل دے ملحقہ نالیاں تے شمالی بلوچستان اچ سیلابی صورتحال پیدا تھی سڳدی اے۔ رپورٹ اچ ضلعی انتظامیہ، ریسکیو اداریاں تے متعلقہ محکمہ جات کوں ہائی الرٹ رہݨ تے ممکنہ ہنگامی صورتحال نال نبڑݨ کیتے پیشگی انتظامات مکمل رکھݨ دی ہدایت کیتی ڳئی اے۔