ال نینو دنیا دے اکثر خطیاں اچ جولائی تے ستمبر وچال شدید موسمی صورتحال دا باعث بݨ سڳدے، ڈبلیو ایم او

اقوامِ متحدہ۔3 جولائی (اے پی پی) اقوامِ متحدہ دے موسمیاتی ادارے ورلڈ میٹرولوجیکل آرگنائزیشن جمعے کوں خبردار کیتا جو تیزی نال شدت اختیار کرݨ آلا ال نینو دنیا دے اکثر خطیاں اچ جولائی تے ستمبر وچال شدید موسمی صورتحال دا باعث بݨ سڳدے۔ اے ایف پی دے مطابق ورلڈ میٹرولوجیکل آرگنائزیشن آکھیا جو بحرالکاہل اچ ال نینو پہلے ای تشکیل پا چکے اتے ایں دی طاقت اچ تیزی نال اضافہ تھیندا پئے۔ ادارے دے مطابق ال نینو وسطی تے مشرقی بحرالکاہل اچ خطِ استوا دے قریبی حصیاں اچ ہر ݙو توں ست سالیں بعد سمندر دی سطح دے درجہ حرارت اچ تھیوݨ آلا اضافہ اے جو آس پاس دے علاقیاں اچ چلݨ آلی ہواواں، دباؤ تے بارش دے پیٹرنز اچ تبدیلیاں دا باعث بݨدے، ایں دے اثرات عموماً 9 توں 12 مہینیاں تائیں برقرار رہندن۔ ڈبلیو ایم او دے مطابق ایں سال ال نینو دی شدت جولائی توں ستمبر دے دوران چار اچوں تریجھے درجے تائیں پڄݨ دا امکان اے۔ بحرالکاہل اچ تشکیل پاوݨ آلے ال نینو دی شدت اچ آوݨ آلے مہینیاں اچ تیزی نال اضافے دے نتیجے اچ دنیا دے ٻہوں سارے حصیاں اچ انتہائی موسمی واقعات دے امکانات ودھ ویسن۔ وسطی تے مشرقی استوائی بحرالکاہل اچ سمندر دے درجہ حرارت اچ مسلسل تے نمایاں حد تائیں اضافہ ݙو ڈگری سینٹی گریڈ تائیں پڄ سڳدے جئیں دا اثر دنیا دے کئی خطیاں تائیں کھںڈ ویسی۔ دریں اثنا استوائی بحرِ اوقیانوس دے طاس دے عام طور تے اوسط توں ودھ گرم رہݨ دا وی امکان اے۔ اے خشک سالی تے بھاری بارش دے امکانات کوں تیز کریسی اتے ٻہوں سارے خطیاں اچ ہک ٻئے دے بعد آوݨ آلی زمینی تے سمندری ہیٹ ویوز دا خطرہ ودھا ݙیسی۔ ڈبلیو ایم او آکھیا جو او تیاریاں دی رہنمائی اچ مدد کیتے خاص طور تے زراعت تے صحت جیویں موسمیاتی حساس شعبیاں اچ ابتدائی انتباہی مدد کوں ودھیندا پئے۔ ال نینو دے باعث 60 ڈگری جنوب تے 60 ڈگری شمال وچال زیادہ تر زمینی علاقیاں اچ درجہ حرارت اوسط توں تجاوز کر ونڄݨ دے ودھ امکان دی پیش گوئی کیتی ڳئی اے جیہڑا قطبی علاقیاں توں ٻاہر تقریباً تمام آبادی آلے علاقیاں دا احاطہ کریندے۔ ال نینو دے زیرِ اثر جنوب مغربی امریکا دے کڄھ حصیاں اچ معمول توں ودھ بارش تے برصغیر پاک و ہند تے آسٹریلیا دے کئی حصیاں اچ معمول توں ڳھٹ بارشاں تھی سڳدن۔