پیرا تعلیمی شعبے اچ نمایاں خدمات انجام ݙیوݨ آلے نجی تعلیمی اداریاں کوں تعریفی اسناد نال نواز ݙتا

اسلام آباد۔4 جولائی (اے پی پی)  پرائیویٹ ایجوکیشنل انسٹی ٹیوشنز ریگولیٹری اتھارٹی (ICT-PEIRA) اِنھاں نجی تعلیمی اداریاں دے اعزاز اچ تقریبِ تقسیمِ تعریفی اسناد دا انعقاد کیتا جنھاں اتھارٹی دی اہم تعلیمی تے سماجی فلاحی کوششاں تے 100 فیصد عمل درآمد کریندیں ہوئیں قابلِ تحسین خدمات انجام ݙتیاں۔ اے اعزاز اُنھاں تعلیمی اداریاں کوں ݙتا ڳیا جنھاں رائٹ ٹو فری اینڈ کمپلسری ایجوکیشن ایکٹ 2012 دے تحت 10 فیصد لوڑھ مند طلبہ کوں وظائف فراہم کیتے، مستحق طبقات دے ٻالاں کوں مفت تعلیم ݙتی تے پیرا ولوں ریفر کیتے ڳئے سکول توں باہر ٻالاں (Out-of-School Children) کوں آپݨے اداریاں اچ داخلہ ݙے تے قومی ذمہ داری ادا کیتی۔تقریب دے مہمانِ خصوصی چیئرمین پیرا ڈاکٹر غلام علی ملاح ہن، جڈانجو چیئرمین فیڈرل بورڈ آف انٹرمیڈیٹ اینڈ سیکنڈری ایجوکیشن پروفیسر ڈاکٹر اکرام علی ملک بطور معزز مہمان شرکت کیتی۔

تقریب اچ پیرا دے اعلیٰ افسران، نجی تعلیمی اداریاں دے سربراہان، تعریفی اسناد حاصل کرݨ آلے نمائندگان تے ٻیاں معزز شخصیات شرکت کیتی۔ ایں موقعے تے خطاب کریندیں ہوئیں چیئرمین پیرا ڈاکٹر غلام علی ملاح نجی تعلیمی اداریاں دیاں خدمات کوں زبردست خراجِ تحسین پیش کریندیں ہوئیں آکھیا جو اے ادارے صرف معیاری تعلیم فراہم نئی کریندے پئے بلکہ معاشرتی ذمہ داری نبھیندیں ہوئیں ایجھے ٻالاں کوں وی تعلیم دے مواقع فراہم کریندے پئن جیہڑے مالی یا سماجی مشکلات پاروں تعلیم توں محروم رہ ویندن۔انھاں آکھیا جو نجی شعبے دا اے تعاون رائٹ ٹو فری اینڈ کمپلسری ایجوکیشن ایکٹ 2012 دے مؤثر نفاذ، مستحق ٻالاں کوں مفت تعلیم دی فراہمی تے سکول توں باہر ٻالاں کوں ولا تعلیمی نظام اچ شامل کرݨ دے قومی مشن اچ انتہائی اہم کردار ادا کریندا پئے۔ ڈاکٹر غلام علی ملاح وزارتِ وفاقی تعلیم تے پیشہ ورانہ تربیت دا خصوصی شکریہ ادا کریندیں ہوئیں آکھیا جو وزارت دی مسلسل سرپرستی، رہنمائی تے حوصلہ افزائی پاروں آئی سی ٹی-پی ای آئی آر اے تعلیمی اصلاحات تے عوامی خدمت دے مختلف اقدامات کامیابی نال جاری رکھے ہوئے ۔ انھاں ایں عزم دا اعادہ کیتا جو اتھارٹی مستقبل اچ وی نجی تعلیمی اداریاں دے اشتراک نال ہر ٻال تائیں معیاری تے مساوی تعلیمی مواقع پہنچاوݨ کیتے آپݨی کوششاں جاری رکھیسی۔ تقریب توں خطاب کریندیں ہوئیں چیئرمین فیڈرل بورڈ پروفیسر ڈاکٹر اکرام علی ملک نجی تعلیمی اداریاں تے بالخصوص انھاں دے اساتذہ دیاں خدمات کوں سراہندیں ہوئیں آکھیا جو محدود وسائل تے نسبتاً گھٹ تنخواہاں دے باوجود نجی سکولاں دے اساتذہ قوم دے مستقبل دی تعمیر اچ قابلِ قدر کردار ادا کریندے پئن۔ انھاں آئی سی ٹی-پی ای آئی آر اے کوں سراہیا جو ایں انھاں اداریاں دیاں خدمات کوں باضابطہ طور تے تسلیم کریندیں ہوئیں انھاں دی حوصلہ افزائی کیتی، جیہڑے معاشرے دے پسماندہ طبقات دے ٻالاں کوں تعلیم فراہم کرݨ اچ نمایاں کردار ادا کریندے پئن۔

تقریب دے اختتام تے نمایاں کارکردگی دا مظاہرہ کرݨ آلے نجی تعلیمی اداریاں دے نمائندگان اچ تعریفی اسناد تقسیم کیتیاں ڳئیاں۔ شرکاء ایں عزم دا اعادہ کیتا جو حکومت، ریگولیٹری اداریاں تے نجی تعلیمی شعبے دے آپسی تعاون نال ایجھا تعلیمی نظام تشکیل ݙتا ویسے جتھ ہر ٻال کوں بلاامتیاز معیاری تعلیم حاصل کرݨ دے مساوی مواقع میسر ہوون۔