دورہِ ویسٹ انڈیز تے انگلینڈ کیتے قومی ٹیسٹ سکواڈ دا اعلان، بابر اعظم کپتان مقرر

لاہور۔5 جولائی (اے پی پی) پاکستان کرکٹ بورڈ ویسٹ انڈیز تے انگلینڈ دے دورے کیتے قومی ٹیسٹ اسکواڈز دا اعلان کر ݙتے۔ لاہور دے قذافی اسٹیڈیم اچ منعقدہ پریس کانفرنس دے دوران سلیکشن کمیٹی دے رکن عاقب جاوید اسد شفیق تے سابق کپتان مصباح الحق دے نال اسکواڈز دا اعلان کیتا، بابر اعظم کوں ݙوہائیں ٹیسٹ سیریز کیتے قومی ٹیم دا کپتان مقرر کیتا ڳئے۔ ویسٹ انڈیز دے خلاف ݙو ٹیسٹ میچاں دی سیریز کیتے 16 رکنی جڈانجو انگلینڈ دے خلاف ترائے ٹیسٹ میچاں دی سیریز کیتے 17 رکنی اسکواڈ دا انتخاب کیتا ڳئے۔ مڈل آرڈر بیٹر سعود شکیل کوں فٹنس نال مشروط طور تے انگلینڈ دے دورے دے اسکواڈ اچ شامل کیتا ڳئے، جڈانجو او ویسٹ انڈیز دے خلاف سیریز دا حصہ نہ ہوسن۔ ویسٹ انڈیز دے خلاف 16 رکنی اسکواڈ اچ بابر اعظم (کپتان)، عامر جمال، عبداللہ فضل، علی عثمان، اذان اویس، امام الحق، خرم شہزاد، محمد عباس، محمد علی، محمد رضوان (وکٹ کیپر)، محمد اویس ظفر، محمد غازی غوری (وکٹ کیپر)، ساجد خان، سلمان علی آغا، شان مسعود تے عبید شاہ شامل ہن۔ انگلینڈ دے خلاف 17 رکنی اسکواڈ اچ ویسٹ انڈیز سیریز دے تمام کھڈاریاں ں دے نال سعود شکیل کوں وی فٹنس کلیئرنس نال مشروط طور تے شامل کیتا ڳئے۔ سلیکشن کمیٹی چار نویں کھڈاریاں کوں پہلی واری ٹیسٹ اسکواڈ اچ موقع ݙتے، جنھاں اچ کھٻے ہتھ دے اسپنر علی عثمان، سڄے ہتھ دے بیٹر محمد اویس ظفر، سڄے ہتھ دے فاسٹ بولر عبید شاہ اتے وکٹ کیپر بیٹر محمد غازی غوری شامل ہن۔پاکستان ٹیم آپݨے دورے دا آغاز ویسٹ انڈیز توں کریستی، پہلا ٹیسٹ 25 توں 29 جولائی تائیں برائن لارا کرکٹ اکیڈمی، ٹرابا اچ جڈانجو ݙوجھا ٹیسٹ 2 توں 6 اگست تائیں کوئنز پارک اوول، پورٹ آف اسپین اچ کھیڈیا ویسے، جیندے بعد قومی ٹیم انگلینڈ دا رخ کریسی، جتھاں ترائے ٹیسٹ میچاں دی سیریز دا پہلا مقابلہ 19 توں 23 اگست تائیں لیڈز، ݙوجھا 27 توں 31 اگست تائیں لارڈز اتے تریجھا 9 توں 13 ستمبر تائیں برمنگھم اچ کھیڈیا ویسے۔