فیفا ورلڈ کپ 2026 توں اخراج دے بعد برازیلین سٹار فٹبالر نیمار دا ریٹائرمنٹ دا اعلان

نیو یارک۔6 جولائی (اے پی پی) برازیل دے مایہ ناز فٹبالر نیمار جونیئر فیفا ورلڈ کپ 2026 دے پری کوارٹر فائنل اچ ناروے دے ہتھوں شکست دے بعد انٹرنیشنل فٹبال توں ریٹائرمنٹ دا اعلان کر ݙتے۔ ڈھاکہ ٹریبیون دے مطابق نیو جرسی امریکا اچ کھیݙے ڳئے میچ اچ ناروے 5 واری دی عالمی چیمپئن برازیل کوں 1-2 توں شکست ݙے تے پہلی واری ورلڈ کپ دے کوارٹر فائنل اچ ڄاہ بݨائی جڈانجو برازیل دا ایونٹ اچ سفر اختتام پذیر تھی ڳیا۔ ناروے دی پاسوں ݙوہائیں گول ایرلنگ ہالینڈ اسکور کیتے۔ انھاں پہلا گول 79 ویں تے ݙوجھا 90 ویں منٹ اچ کیتا، جڈانجو برازیل ولوں واحد گول نیمار جونیئر میچ دے اختتامی لمحات اچ پنالٹی کک تے اسکور کیتا۔ شکست دے بعد ورلڈ کپ جِتّݨ دا خواب تُرٹݨ تے نیمار جونیئر جذبات تے قابو نہ رکھ سڳیے اتے میدان اچ آبدیدہ تھی ڳئے۔ بعد اچ انھاں انٹرنیشنل فٹبال توں ریٹائرمنٹ دا اعلان کر ݙتا۔ واضح رہوے جو نیمار جونیئر 2010 اچ امریکہ دے خلاف ایں سٹیڈیم اچ آپݨا پہلا انٹرنیشنل گول کیتا ہئی۔ حالیہ برساں اچ فٹنس مسائل دا شکار رہوݨ آلے نیمار کوں ہیڈ کوچ کارلو اینسیلوٹی حیران کن طور تے اسکواڈ اچ شامل کیتا ہئی، جتھاں او انجری پاروں پہلے 2 میچز نئی کھیݙ سڳے ہن جڈانجو اسکاٹ لینڈ دے خلاف میچ توں انھاں اکتوبر 2023 دے بعد پہلی واری میدان اچ واپسی کیتی ہئی۔ غیر ملکی میڈیا دے مطابق برازیلین صحافیاں نال ڳالھ مہاڑ کریندیں ہوئیں نیمار جونیئر آکھیا میں پوری کوشش کیتی، اے سب ایں ای سٹیڈیم توں شروع تھیا ہئی اتے میں اتھاہیں ایں دا اختتام کیتا۔ نیمار جونیئر دی ریٹائرمنٹ دے اعلان دے بعد دنیا بھر دے فٹبال شائقین ولوں انھاں کوں شاندار بین الاقوامی کیریئر تے خراجِ تحسین پیش کیتا ویندا پئے۔