معاشی اصلاحات تے جدیدکاری دے عمل اچ ٹیکنالوجی دا فروغ تے سرمایہ کاری دے ذرائع کوں متنوع بݨاوݨ بنیادی اہمیت رکھیندن، وفاقی وزیرِ خزانہ محمد اورنگزیب دا انویسٹ پاک پورٹل دی افتتاحی تقریب توں خطاب

اسلام آباد۔6 جولائی (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو معاشی اصلاحات تے جدیدکاری دے عمل اچ ٹیکنالوجی دا فروغ تے سرمایہ کاری دے ذرائع کوں متنوع بݨاوݨ بنیادی اہمیت رکھیندن، انویسٹ پاک پورٹل دے آغاز نال ریٹیل سرمایہ کاراں کیتے ٻئے نویں تے اسان سرمایہ کاری دے مواقع ملسن۔ انھاں اے ڳالھ سنوار کوں کراچی اچ سٹیٹ بینک آف پاکستان دے انویسٹ پاک پورٹل دی افتتاحی تقریب توں خطاب کریندیں ہوئیں آکھی۔ وزیرِ خزانہ پورٹل دے اجراء تے گورنر اسٹیٹ بینک تے انھاں دی پوری ٹیم کوں مبارکباد پیش کیتی اتے آکھیا جو اے اقدام ملک اچ سرمایہ کاری دے ہک نویں دور دا آغاز ثابت ہوسی۔ وزیرِ خزانہ آکھیا جو ایں توں پہلے او راست پروگرام دے آغاز دے موقعے تے وی اسٹیٹ بینک آئے ہن، اج راست پاکستان دے ڈیجیٹل مالیاتی نظام دا سب توں مضبوط ستون بݨ ڳئے، راست پروگرام ادائیگیاں دے نظام اچ انقلابی تبدیلیاں متعارف کرائن، وزیرِ اعظم خود کیش لیس پاکستان اقدام دی قیادت کریندے پئن۔ انھاں ایں امر تے اطمینان دا اظہار کیتا جو راست اب ہک خودمختار گورننس ڈھانچے تے موثر آپریٹنگ ماڈل دے تحت کام کریندا پئے۔ انھاں آکھیا جو معاشی اصلاحات تے جدیدکاری دے عمل اچ ٹیکنالوجی دا فروغ تے سرمایہ کاری دے ذرائع کوں متنوع بݨاوݨ بنیادی امور ہن ایں سلسلے اچ نجی شعبے دے تعاون نال جاز کیش دے ذریعے ڳھٹ توں ڳھٹ پنچ ہزار روپے توں حکومتی ٹریژری بلز اچ سرمایہ کاری دی سہولت متعارف کرائی ڳئی، جئیں دے نتیجے اچ ہݨ تائیں ہک ہزار توں ودھ نویں سرمایہ کار ایں نظام توں مستفید تھین۔ انھاں آکھیا جو انویسٹ پاک پورٹل دے آغاز نال ریٹیل سرمایہ کاراں کیتے مزید نویں تے اسان سرمایہ کاری دے مواقع ملسن۔ وزیرِ خزانہ آکھیا جو گزریل اٹھارہ مہینیں دے دوران پاکستان اسٹاک مارکیٹ اچ نویں سرمایہ کاراں دی نمایاں تعداد شامل تھئی اے، جنھاں اچ نوجوان، بالخصوص جنریشن زی (Gen Z) دا وݙا حصہ شامل اے۔ انھاں امید ظاہر کیتی جو اسٹیٹ بینک دا اے نواں اقدام مزید نوجواناں کوں سرمایہ کاری آلے پاسے راغب کرݨ اچ اہم کردار ادا کریسی۔