تیزی نال ودھدی آبادی تے موسمیاتی تبدیلی پاکستان کیتے سب توں وݙے چیلنجز ہن، سینیٹر محمد اورنگزیب

اسلام آباد۔15جولائی (اے پی پی) وفاقی وزیرِ خزانہ تے محصولات سینیٹر محمد اورنگزیب آکھیا جو تیزی نال ودھدی آبادی تے موسمیاتی تبدیلی پاکستان کیتے سب توں وݙے چیلنجز ہن، جے ملک دی تیزی نال ودھدی ہوئی آبادی تے موسمیاتی تبدیلی سویں بنیادی چیلنجز نال مؤثر انداز اچ نہ نبڑیا تاں ملک آپݨی حقیقی ترقی دی صلاحیت حاصل نہ کر سڳسی۔ وزیرِ خزانہ اِنھاں ݙوہیں مسئلیاں کوں وجودی نوعیت دے چیلنجز قرار ݙیندیں ہوئیں آکھیا جو اِنھاں نال نٻڑݨ کیتے مستقل پالیسی اصلاحات، ادارہ جاتی ہم آہنگی تے طویل المدتی مالی وسائل ناگزیر ہن۔ اے ڳالھیں انھاں عالمی یومِ آبادی 2026 دے موقعے تے تھیوݨ آلی تقریب توں خطاب کریندیں ہوئیں کیتا۔ انھاں آکھیا جو حکومت دی کوششاں نیشنل پاپولیشن سٹیبلائزیشن پلان توں اڳوں ودھ تے ہݨ نیشنل پاپولیشن کونسل تائیں پڄ ڳئن جئیں اچ سول تے عسکری قیادت، وفاق تے صوبائی حکومتاں کوں مؤثر عملدرآمد کیتے ہک پلیٹ فارم تے جمع کیتا ڳئے ۔ انھاں آکھیا جو اساں ہک طویل عرصے توں جاݨدے ہئیں جو مسئلہ کیا اے اتے کیوں اے، اصل سوال ہمیشہ اے رہیے جو ایں کوں کیویں تے کون حل کریسی۔ انھاں آکھیا جو نیشنل پاپولیشن کونسل واضح اہداف، کلیدی کارکردگی اشاریاں تے باقاعدہ جائزے دے ذریعے نتائج یقینی بݨیسی۔ انھاں وزارتِ صحت کوں یقین ݙوایا جو وزارتِ خزانہ ایں سلسلے اچ ہر ممکن تعاون جاری رکھیسی۔مالی وسائل دے حوالے نال وزیرِ خزانہ آکھیا جو صرف بجٹ تے انحصار کافی نہ تھیسی۔ انھاں ݙسایا جو گزشتہ سال عالمی بینک دے نال طے پاوݨ آلے 10 سالہ کنٹری پارٹنرشپ فریم ورک اچ آبادی کوں تین بنیادی ترجیحات اچ شامل کیتا ڳئے جئیں دے تحت تعلیمی پسماندگی خصوصاً سکول توں باہر ٻالڑیاں دی تعلیم تے ٻالیں اچ غذائی قلت دے خاتمے تے توجہ ݙتی ویسی۔ انھاں آکھیا جو ایں فریم ورک دے تحت آبادی توں متعلق منصوبیاں کیتے سالانہ 600 توں 700 ملین امریکی ڈالر تائیں دی مالی معاونت دستیاب ہوسی۔سینیٹر محمد اورنگزیب خاندانی منصوبہ بندی توں متعلق آگاہی مہم بالخصوص “پیدائش اچ وقفہ” کوں سراہندیں ہوئیں ایں کوں ݙاݙھی مؤثر قرار ݙتا۔وزیرِ خزانہ بنگلہ دیش، ایران تے انڈونیشیا دی مثال ݙیندیں ہوئیں آکھیا جو اِنھاں ممالک 10 توں 15 سال دے دوران ٻالڑیاں دی تعلیم، تریمتیں دی افرادی قوت اچ شمولیت تے مذہبی رہنماواں دے تعاون نال آبادی اچ اضافے دی شرح کوں تقریباً ہک فیصد تائیں محدود کرݨ اچ کامیابی حاصل کیتی اے، پاکستان کوں وی اِنہیں شعبیاں تے توجہ ݙیوݨی پوسی۔انھاں ایں عزم دا اظہار کیتا جو وزیرِاعظم دی سربراہی اچ قائم نیشنل پاپولیشن کونسل دی قیادت اچ حکومت ہر ممکن مالی، انتظامی تے پالیسی تعاون فراہم کریندی رہسی تانجو آبادی اچ توازن دے قومی ہدف کوں حاصل کیتا ونڄ سڳے۔