سرائیکی اکیڈمی اسلام آباد ولوں پاکستان سرائیکی پارٹی دے مرکزی صدر ڈاکٹر محمد نعمان طیب چنگوانی دے اعزاز اچ باوقار ادبی تقریب

اسلام آباد۔15جولائی (اے پی پی)سرائیکی اکیڈمی اسلام آباد ولوں نیشنل پریس کلب اسلام آباد اچ پاکستان سرائیکی پارٹی دے مرکزی صدر ڈاکٹر محمد نعمان طیب چنگوانی دے اعزاز اچ ہک باوقار فکری و ادبی تقریب تھئی جیندے اچ سرائیکی زبان، سرائیکی ادب، سرائیکی وسیب اتے سرائیکی صوبے بارے موجودہ دور دے اہم مسائل تے مذاکرہ تھیا۔ تقریب اچ سینئر شاعر وفا چشتی، غلام یٰسین بھٹی، ڈاکٹر سعدیہ کمال، حبیب حسین جعفری، اشعر قریشی، تمیم چنگوانی، واسو خان، شیث، محمد عسکری نقوی سودھا اسلام آباد تے راولپنڈی اچ مقیم سرائیکی کمیونٹی دے ادیباں، شاعراں، دانشوراں، طلبہ اتے مختلف شعبیاں دے لوکاں شرکت کیتی۔ تقریب دی نظامت معروف ادیب، صحافی تے سرائیکی اکیڈمی اسلام آباد دے جنرل سیکرٹری محمد شاہد دھریجہ کیتی۔ آپݨے خطاب اچ ڈاکٹر محمد نعمان طیب چنگوانی آکھیا جیکر پاکستان دے ٻئے صوبے لسانی بنیاداں تے قائم ہن تاں ول اٹھ کروڑ توں ودھ سرائیکی بولݨ آلے عوام کوں آپݨی شناخت اتے انتظامی وحدت توں محروم رکھݨ دا کوئی آئینی یا جمہوری جواز موجود کائنی۔ انھاں آکھیا جو سرائیکی صوبے دا مطالبہ کہیں قوم، زبان یا صوبے دے خلاف نئی ٻھل آئینِ پاکستان، جمہوری اصولاں اتے عوام دے بنیادی حقوق دے مطابق ہک پرامن اتے آئینی جدوجہد اے، سرائیکی زبان ہزاراں سالاں دی تہذیب، تاریخ، ثقافت اتے صوفیانہ روایت دی امین اے، ایں کیتے ایںدی شناخت، ترویج اتے تحفظ وقت دی اہم ترین ضرورت اے۔ انھاں ایں زور ݙتا جو ہر زبان قابلِ احترام اے، ٻنھان زباناں آلی کار سرائیکی زبان کوں بھی ایںدا جائز مقام ݙتا ونڄݨا چاہیدے۔ تقریب اچ سرائیکی زبان، سرائیکی صوبہ تے سرائیکی ادب کوں درپیش موجودہ چیلنجز دے حوالے نال شرکاء ڈاکٹر محمد نعمان طیب چنگوانی توں مختلف سوالات کیتے، جنھاں دے انھاں تفصیلی اتے مدلل جوابات ݙتے۔انھاں آکھیا جو اڄ سرائیکی زبان کوں سب توں وݙا خطرہ نویں نسل دی مادری زبان توں دوری، تعلیمی اداریاں اچ مناسب نمائندگی نہ ملݨ تے سرکاری سرپرستی دے فقدان توں اے۔ ایںدا مؤثر حل اے اے جو سرائیکی زبان کوں نصاب، جامعات، سرکاری اداراں تے ڈیجیٹل پلیٹ فارمز اچ مناسب مقام ݙتا ونجے۔ سرائیکی صوبے دے مطالبے تے انھاں واضح کیتا جو اے مطالبہ آئینی، انتظامی اتے معاشی بنیاداں تے قائم اے۔ انھاں دے مطابق الگ صوبے دے قیام نال وسائل دی منصفانہ تقسیم، بہتر طرزِ حکمرانی، انتظامی سہولت تے وسیب دی پسماندگی دے خاتمے اچ مدد ملسی۔ انھاں نوجوان نسل تے زور ݙتا جو او آپݨی مادری زبان تے فخر کرے، گھراں اچ سرائیکی ٻولے، سرائیکی کتاباں پڑھے، ادبی سرگرمیوں اچ حصہ گھنے تے جدید ٹیکنالوجی کوں زبان دے ودھارے کیتے استعمال کرے۔ تعلیمی نظام دے حوالے نال ڈاکٹر چنگوانی آکھیا جو سرائیکی زبان کوں پرائمری توں یونیورسٹی سطح تائیں بطور مضمون تے ذریعۂ تحقیق متعارف کرایا ونجݨا چاہیدے تاں جو زبان دی علمی بنیاد مضبوط تھیوے۔ ڈیجیٹل میڈیا تے مصنوعی ذہانت دے دور کوں انھاں سرائیکی زبان کیتے ہک ٻہوں وݙا موقع قرار ݙیندیں ہوئیں آکھیا جیکر سرائیکی اچ معیاری ڈیجیٹل مواد، ای بکس، آڈیو بکس، تحقیقی ڈیٹا تے مصنوعی ذہانت کیتے لسانی ذخیرہ تیار کیتا ونجے تاں سرائیکی عالمی سطح تے بھی مؤثر انداز اچ متعارف تھی سڳدی اے۔ انہاں افسوس کیتے جو سرائیکی ادیباں، شاعراں اتے فنکاراں کوں قومی سطح تے او نمائندگی تے سرکاری سرپرستی حاصل نئی جیہڑی انھاں کوں ملݨی چاہیدی ہئی۔ انھاں حکومت، جامعات، ادبی تنظیماں اتے میڈیا تے زور ݙتا جو او سرائیکی زبان، ثقافت تے لوک ورثے دے تحفظ کیتے مربوط حکمتِ عملی اختیار کرݨ، ڄیکر سرائیکی زبان، ادب، ثقافت تے سرائیکی صوبے دے مسئلے تے فوری تے سنجیدہ توجہ نہ ݙتی ڳئی تاں آوݨ آلیاں نسلیں آپݨی لسانی شناخت، تاریخی ورثے تے ثقافتی سرمائے توں محروم تھی سڳدن، ایں سانڳے سرائیکی وسیب دے عوام دے آئینی حقوق کوں منیندے ہوئیں انھاں دے جائز مطالبات تے عملی پیش رفت کیتی ونجے۔ چھیکڑ تے پی ایف یو جے ورکرز دی مرکزی رہنما تے سرائیکی اکیڈمی اسلام آباد دی صدر ڈاکٹر سعدیہ کمال معزز مہمانِ خصوصی ڈاکٹر محمد نعمان طیب چنگوانی، سینئر ادیباں، شاعراں، دانشوراں، صحافیاں اتے اسلام آباد و راولپنڈی توں آوݨ آلے شرکاء دا شکریہ ادا کیتا۔ انھاں آکھیا جو سرائیکی اکیڈمی اسلام آباد دا مقصد سرائیکی زبان، ادب، ثقافت تے وسیب دے مثبت تشخص کوں ودھارا ݙیوݨ تے وفاقی دارالحکومت اچ سرائیکی اہلِ قلم تے دانشوراں کوں ہک مؤثر علمی و ادبی پلیٹ فارم ݙیوݨ اے، اکیڈمی اڳو تے وی سرائیکی زبان، ادب تے وسیب دے اجتماعی حقوق دے حوالے نال اینڄھی فکری، ادبی تے ثقافتی تقریبات کرویندی رہسی تاں جو نویں نسل اچ آپݨی مادری زبان اتے ثقافتی ورثے نال محبت تے آگہی کوں ودھارا ݙتا ونج سڳے۔